شىمكەنت قالاسىندا «تاۋەلسىزدىك – بابالار اماناتى» اتتى جاس اقىندار اراسىندا رەسپۋبليكالىق «كۇمىس قالام» پوەزيالىق كەشى مارەسىنە جەتتى. ەلىمىزدىڭ تۇكپىر-تۇكپىرىنەن جينالعان جاس اقىنداردىڭ ىشىنەن وزا ششاۋىپ، جارقىراي كورىنگەن ۇزدىكتەر انىقتالدى.
اقتوبە وبلىسىنان كەلگەن ەرشات قايبولدين ادەبي بايقاۋدىڭ باس جۇلدەسى «كۇمىس قالام» يەگەرى اتاندى. جەڭىمپازعا ارنايى كۇمىستەن جاسالعان قالام مەن باعالى سىيلىق تابىس ەتىلدى. الماتى وبلىسىنىڭ وكىلى ايدانا قايساربەك فيناليست اتانىپ، «ەسەنعالي راۋشانوۆ» اتىنداعى ارنايى سىيلىقپەن ماراپاتتالدى.
جارتىلاي فينالعا وتكەن 4 اقىن – نۇربولات جولداسبەك (جامبىل وبلىسى) «جاركەن بودەشۇلى»، ءالىمجان الىشەر (شىمكەن قالاسى) «ءابىلدا ايماق»، مۇقاعالي كەنجەتاي (تۇركىستان وبلىسى) «جەڭىس ءباھادۇر»، سالتانات ماديارقىزى (شىمكەنت قالاسى) «ءادىل بوتپانوۆ» اتىنداعى سىيلىققا يە بولدى. قالعان 14 اقىنعا قالاماقى مەن باعالى سىيلىقتار بەرىلدى. Nur Otan پارتياسى شىمكەنت قالالىق فيليالى توراعاسىنىڭ ءبىرىنشى ورىنباسارى جانار بەكتاەۆا قاتىسۋشىلارعا العىسىن جەتكىزىپ، جەڭىمپازدار مەن جۇلدەگەرلەردى ماراپاتتادى. ءىس-شارادا قازاقستان جازۋشىلار وداعى باسقارما توراعاسىنىڭ ورىنباسارى باقىت بەدەلحان، قر ەڭبەك سىڭىرگەن قايراتكەرى ءحانبيبى ەسەنقاراقىزى، قر جازۋشىلار وداعىنىڭ مۇشەسى باقىتجان الديار، «قاراتاۋ» ءداستۇرلى ونەر مەكتەبىنىڭ ۇستازى اباي قالشابەك، «ايتىس اقىندارى مەن جىرشى-تەرمەشىلەردىڭ حالىقارالىق وداعىنىڭ» مۇشەسى بەكمۇرات انارباەۆ اقىندارعا ءوز باعاسىن بەرىپ، جەڭىمپازداردى انىقتادى.
ايتا كەتسەك، بايقاۋدىڭ ماقساتى – تاۋەلسىزدىكتىڭ 30 جىلدىعىندا جەتكەن جەتىستىكتەردى ناسيحاتتاۋ، ادەبي ۇردىستە دارىندى جاس اقىنداردىڭ جارقىراپ كورىنۋىنە جول اشۋ.
