ەلدىك مۇددە جولىندا تىزە قوسىپ قيمىلداۋ - بارشامىزدىڭ قاسيەتتى پارىزىمىز. بۇل تۋرالى جامبىل جاباەۆتىڭ 175 جىلدىعىنا ارنالعان «ۇلى دالا اقىنى» اتتى حالىقارالىق كونفەرەنتسيادا قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ ايتتى، دەپ حابارلايدى «ادىرنا» ءتىلشىسى قازاقپاراتقا سىلتەمە جاساپ.
«ازاماتتارعا، اسىرەسە، وسكەلەڭ ۇرپاققا ءبىلىم بەرۋ – مەملەكەتتىڭ ماڭىزدى مىندەتتەرىنىڭ ءبىرى. ال مادەنيەت – وتباسىندا جانە وسكەن ورتادا العان تاربيەدەن باستالادى. سول ءۇشىن قوعامنىڭ مادەنيەتتى بولۋىنا مەملەكەتپەن قاتار ءار وتباسى دا جاۋاپتى. مۇنداي ورتاق جۇكتى مەملەكەت پەن قوعام تىزە قوسىپ، تەڭدەي كوتەرىسۋگە ءتيىس. بۇل ىستە، اسىرەسە، زيالى قاۋىمعا ارتىلار سالماق ەرەكشە. قاي زاماندا دا ەلدىك ماسەلەنىڭ دۇرىس-بۇرىسىن ەل اعالارى باعدارلاپ كەلگەن. اعىلشىندار شەكسپيرمەن ماقتانىپ، ورىستار پۋشكيندى ءپىر تۇتسا، ءبىز دە ۇلى تۇلعالارىمىز بەن كلاسسيكتەرىمىزگە سۇيەنەمىز. ەلدىك مۇددە جولىندا تىزە قوسىپ قيمىلداۋ بارشامىزدىڭ قاسيەتتى پارىزىمىز دەپ ەسەپتەيمىن»، - دەدى پرەزيدەنت اكىمشىلىگى باسشىسىنىڭ ءبىرىنشى ورىنباسارى.
ول تاياۋدا جازۋشىلار وداعىندا بولىپ، ينتەللەگەنتسيا وكىلدەرىمەن كەزدەسۋىندە ءوز ويلارىمەن بولىسكەنىن اتاپ ءوتتى.
«مەملەكەت باسشىسىنىڭ تاپسىرماسىنا سايكەس ەلىمىزدە قالامگەرلەردى، اسىرەسە جاس اقىن-جازۋشىلاردى قولداۋ ءىسى قارقىندى تۇردە جالعاساتىن بولادى. وتكەن جىلى زياتكەرلىك قوعامداستىعىنىڭ بىرقاتار وكىلى اباي اتىنداعى مەملەكەتتىك سىيلىققا لايىق دەپ تانىلدى. بيىل، تاۋەلسىزدىك كۇنى قارساڭىندا دا كوپتەگەن ادەبيەت وكىلدەرى مەملەكەتتىك ناگرادا الادى. جىل سايىن ادەبيەت پەن مادەنيەت قايراتكەرلەرى پرەزيدەنتتىك ستيپەنديا بەرىلەدى»، - دەدى داۋرەن اباەۆ.
«ادىرنا» ۇلتتىق پورتالى
