«ەڭبەك» باعدارلاماسىمەن 20 مىڭعا جۋىق ادام جۇمىسپەن قامتىلدى

1480
Adyrna.kz Telegram

شىمكەنت قالاسىنىڭ اكىمى مۇرات ايتەنوۆ جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ب.ناربەكوۆانىڭ 9 ايلىق ەسەبىن قابىلدادى.

قالادا 2021 جىلى «ەڭبەك» باعدارلاماسى شەڭبەرىندە 33 500 ادامدى جۇمىسپەن قامتۋ شارالارىنا قاتىستىرۋ جوسپارلانىپ، ەسەپتى كەزەڭدە 19 347 ادام جۇمىسقا ورنالاسقان.

باسقارما باسشىسىنىڭ سوزىنشە، مەملەكەتتىك باعدارلامانىڭ ءى باعىتى بويىنشا 2 675 ادام 3 ايلىق كاسىپتىك وقىتۋ كۋرستارىنا، ءىى باعىتىندا 2 155 ادام «باستاۋ بيزنەس» جوباسىمەن كاسىپكەرلىك كۋرسىنا وقىتۋعا جولداندى. شاعىن نەسيەنى 53 ادام السا، 584 ادامعا مەملەكەتتىك گرانت بەرىلدى.

باعدارلامانىڭ ءىىى باعىتى بويىنشا (حالىقتى جۇمىسپەن قامتۋعا جاردەمدەسۋ) 8 168 ادام بوس جانە جاڭا جۇمىس ورىندارعا، 336 ادام الەۋمەتتىك جۇمىسقا، 2 531 ادام جاستار پراكتيكاسىنا، 2 845 ادام قوعامدىق جانە 115 ادام «العاشقى جۇمىس ورىندارى» جوباسى بويىنشا 24 ايعا جولداندى.

ب.ناربەكوۆا حالىقتى الەۋمەتتىك قورعاۋ باعىتى جونىندە دە ايتىپ ءوتتى. وسى جىلدىڭ ءى توقسانىندا 36 969 وتباسىعا (179 209 ادام), ءىى توقساندا 30 962 وتباسىعا (149 147 ادامعا), ءىىى-توقساندا 19 333 وتباسىعا (90 177 ادامعا) مەملەكەتتىك اتاۋلى الەۋمەتتىك كومەك تولەنگەن.

پىكىرلەر