شىمكەنتتە ءوتىپ جاتقان جاس اقىندار اراسىنداعى ونەر دوداسىنىڭ جەڭىمپازدارى انىقتالدى. ەل تاۋەلسىزدىگىنىڭ 30 جىلدىعىنا ورايلاستىرعان «تاۋەلسىزدىك – بابالار اماناتى» اتتى جاس اقىندار بايقاۋى اياسىندا ۇيىمداستىرىلعان ءسوز دوداسىنا ەلىمىزدىڭ ءار وڭىرىنەن 16 اقىن جينالعان بولاتىن.
ون التى اقىن وتىز جىلدىق مەرەيلى تويىمىزدى ورامدى وي، سۇبەلى سوزىمەن سيپاتتاپ، مايدان قىل سۋىرعانداي جىرلادى. تىڭداۋشىنىڭ قۇلاق قۇرىشىن قاندىرعان ءسوز باسەكەسىندە سەگىز جۇپ ماڭىزدى ايتىستىڭ پارىزىن ءتۇسىنىپ، ناعىز ايتىستىڭ قاس ۇلگىسىن كورسەتتى.
قاراتاۋ ءداستۇرلى ونەر مەكتەبىندەگى رەسپۋبليكالىق «كۇمىس دومبىرا» ايتىسىندا اقمولالىق اقىن نۇرماحان جاقىپبەك باس جۇلدەگە يە بولدى.
شىعىس قازاقستان وبلىسىنىڭ اتىنان ونەر كورسەتكەن سەمەيلىك ارۋ ايشولپان تولەۋتاي ءبىرىنشى ورىندى قانجىعاسىنا بايلادى. ال ەكىنشى ورىن قىزىلوردالىق بەكسۇلتان ورىنباساروۆقا بۇيىردى. تۇركىستان وبلىسىنىڭ نامىسىن قورعاعان مەيىرجان جاقىپ پەن شىمكەنتتىك نۇرعالي ءاناپيا ءۇشىنشى ورىندى ءوزارا ءبولىستى.
ال الماتىلىق بەكجان بازاربەك مايلىقوجا سۇلتانقوجاۇلى اتىنداعى ارنايى جۇلدەگە يە بولدى. نۇر-سۇلتان قالاسىنان كەلگەن ايىم اسىلبەكقىزى اسەلحان قالىبەكوۆا اتىنداعى سىيلىقتىڭ لاۋرەاتى اتاندى. بارلىق جەڭىمپازدارعا ارنايى باعالى سىيلىقتار تابىستالدى.
ماراپاتتاۋ راسىمىندە ءسوز العان شىمكەنت قالاسى ءماسليحاتىنىڭ حاتشىسى باحادىر نارىمبەتوۆ ايتىسكەرلەردى جەڭىستەرىمەن قۇتتىقتاپ، ساتتىلىك تىلەدى.
ايتا كەتەيىك، الامان ءسوز دوداسىندا بەلگىلى ايتىسكەر اقىندار ءادىل باعاسىن بەرىپ، قازىلىق ەتتى. اتاپ وتسەك، ب.شويبەكوۆ، م.ەسجانوۆا، ك.ورالوۆا، م.نيازوۆ سىندى ايتىستىڭ جۇيرىكتەرى مەن بەلگىلى جۋرناليست، «شىمكەنت كەلبەتى»، «پانوراما شىمكەنتا» گازەتتەرىنىڭ باس رەداكتورى ب.تايجان قازىلار القاسى قۇرامىنان تابىلدى.
ا.جادىگەرۇلى
