Shymkentte ótip jatqan jas aqyndar arasyndaǵy óner dodasynyń jeńimpazdary anyqtaldy. El Táýelsizdiginiń 30 jyldyǵyna oraılastyrǵan «Táýelsizdik – babalar amanaty» atty jas aqyndar baıqaýy aıasynda uıymdastyrylǵan sóz dodasyna elimizdiń ár óńirinen 16 aqyn jınalǵan bolatyn.
On alty aqyn otyz jyldyq mereıli toıymyzdy oramdy oı, súbeli sózimen sıpattap, maıdan qyl sýyrǵandaı jyrlady. Tyńdaýshynyń qulaq quryshyn qandyrǵan sóz básekesinde segiz jup mańyzdy aıtystyń paryzyn túsinip, naǵyz aıtystyń qas úlgisin kórsetti.
Qarataý dástúrli óner mektebindegi respýblıkalyq «Kúmis dombyra» aıtysynda aqmolalyq aqyn Nurmahan Jaqypbek bas júldege ıe boldy.
Shyǵys Qazaqstan oblysynyń atynan óner kórsetken semeılik arý Aısholpan Tóleýtaı birinshi oryndy qanjyǵasyna baılady. Al ekinshi oryn qyzylordalyq Beksultan Orynbasarovqa buıyrdy. Túrkistan oblysynyń namysyn qorǵaǵan Meıirjan Jaqyp pen shymkenttik Nurǵalı Ánapııa úshinshi oryndy ózara bólisti.
Al almatylyq Bekjan Bazarbek Maılyqoja Sultanqojauly atyndaǵy arnaıy júldege ıe boldy. Nur-Sultan qalasynan kelgen Aıym Asylbekqyzy Áselhan Qalybekova atyndaǵy syılyqtyń laýreaty atandy. Barlyq jeńimpazdarǵa arnaıy baǵaly syılyqtar tabystaldy.
Marapattaý rásiminde sóz alǵan Shymkent qalasy máslıhatynyń hatshysy Bahadyr Narymbetov aıtyskerlerdi jeńisterimen quttyqtap, sáttilik tiledi.
Aıta keteıik, alaman sóz dodasynda belgili aıtysker aqyndar ádil baǵasyn berip, qazylyq etti. Atap ótsek, B.Shoıbekov, M.Esjanova, K.Oralova, M.Nııazov syndy aıtystyń júırikteri men belgili jýrnalıst, «Shymkent kelbeti», «Panorama Shymkenta» gazetteriniń bas redaktory B.Taıjan qazylar alqasy quramynan tabyldy.
A.JÁDIGERULY
