قازاقستان رەسپۋبليكاسى تاۋەلسىزدىگىنىڭ 30 جىلدىعى جانە جامبىل جاباەۆتىڭ 175 جىلدىعىنا وراي شىمكەنت قالالىق اكىمدىگىنىڭ قولداۋىمەن "تۇركىستان سارايىندا" جامبىل اتىنداعى قازاق مەملەكەتتىك فيلارمونياسى قر مەملەكەتتىك اكادەميالىق سيمفونيالىق وركەسترى جانە «TURAN» فولكلورلى-ەتنوگرافيالىق توبىمەن بىرگە «FOLK & SYMPHONY» اتتى كونتسەرتتىك باعدارلاماسىن ۇسىندى.
جامبىل اتىنداعى فيلارمونيانىڭ كوركەمدىك جەتەكشىسى قازاقستاننىڭ ەڭبەك سىڭىرگەن قايراتكەرى امانتاي بەرعاليەۆتىڭ ايتۋىنشا، قازاقستان رەسپۋبليكاسىنىڭ مەملەكەتتىك اكادەميالىق سيمفونيالىق وركەسترى 1958 جىلى جامبىل اتىنداعى قازاق مەملەكەتتىك فيلارمونياسىنىڭ قۇرامىنا ەنگىزىلگەن.
-ۇزاق جىلعى شىعارماشىلىق جولىندا ۇجىمدى كوپتەگەن اتاقتى مۋزىكانتتار باسقاردى. قازىر وركەسترگە تالانتتى جاس ديريجەر قانات وماروۆ جەتەكشىلىك ەتەدى. قازاق كومپوزيتورلارىنىڭ جاڭا تۋىندىلارىن ناسيحاتتاۋدا سيمفونيالىق وركەستردىڭ ءرولى زور، جانە ولارمەن شىعارماشىلىق دوستىعى بۇرىننان كەلە جاتقان داستۇرلەرگە يە. ال "تۇركىستان سارايىندا" قويىلعان كونتسەرت بۇل قازاق ءان ونەرىندەگى فولكلورلىق تۋىندىلار مەن سيمفونيالىق وركەستر شىعارمالارىنىڭ ءوزارا سينتەزى، - دەدى ول.
«TURAN»فولكلورلى-ەتنوگرافيالىق ءانسامبلى 2008 جىلى قۇرمانعازى اتىنداعى قازاق ۇلتتىق كونسەرۆاتورياسىنىڭ قابىرعاسىندا قۇرىلعان. «تۇران» – قازاق حالقىنىڭ كونەدەن كەلە جاتقان ءتول مۋزىكالىق ونەرىن قازىرگى زامان ۇرپاعىنىڭ تالعام-تانىم تارازىسىمەن قايتا جاڭعىرتۋدى ماقسات تۇتقان ۇلتتىق ەتنو-فولكلورلىق توپ. توپ – ۇلتتىق كونە اسپاپتاردىڭ ءۇنىن قايتا ءتىرىلتۋدى، جاڭا ۇندەستىك پەن ءادىس-تاسىلدەردى تاۋىپ قولدانىسقا ەنگىزۋدى كوزدەيدى. وتىزدان استام قازاق حالقىنىڭ ۇلتتىق اسپاپتارى بولسا، مۋزىكانتتاردىڭ ارقايسىسى سولاردىڭ بىرنەشەۋىندە ويناۋدى مەڭگەرگەن. سولاردىڭ ىشىندە، سىبىزعى، سازسىرناي، دومبىرا، ءۇش ىشەكتى دومبىرا، جەتىگەن، باس جەتىگەن، قىلقوبىز، نارقوبىز، شاڭقوبىز، شەرتەر، شىڭكىلدەك، ۇرمالى، شۋلى-سىلدىرلى اسپاپتار، سونىمەن قاتار تۇركى الەمىنە ورتاق كومەيمەن قايلاۋ ءان ايتۋ ونەرى جانە تاعى باسقالار بار.
سونداي-اق باعدارلامادا قازاق كومپوزيتورلارى مەن ءانسامبلدىڭ اۆتورلىق شىعارمالارى ورىندالدى.
