جاستار تەاترى «ىبىراي» پەاساسىن ساحنالادى

2588
Adyrna.kz Telegram

ەل تاۋەلسىزدىگىنىڭ 30 جىلدىعى مەن قازاقتىڭ تۇڭعىش اعارتۋشىسى ى.ءالتىنساريننىڭ 180 جىلدىعىنا وراي شىمكەنتتىك «17» جاستار تەاترى «ىبىراي» دراما-ومماجىن ساحنالادى. قويىلىم تۇساۋكەسەرىنە شىمكەنت قالاسى اكىمىنىڭ ورىنباسارى ش.مۇقان، پەسا اۆتورى، دراماتۋرگ م. وماروۆا جانە زيالى قاۋىم وكىلدەرى قاتىستى.

دراماتۋرگ م.وماروۆانىڭ ايتۋىنشا، پەسا جاستار تەاترىنىڭ ديرەكتورى، ءارى كوركەمدىك جەتەكشىسى رۇستەم اۋەلبەكوۆتىڭ ۇسىنىسىمەن جازىلعان.

— ۇلى اعارتۋشى-پەداگوگ ى.ءالتىنساريننىڭ 180 جىلدىعىنا وراي تەاتر ديرەكتورىنان پەسا جازۋعا ۇسىنىس تۇسكەندە ءبىراز ىزدەنۋگە تۋرا كەلدى. سەبەبى، ى. ءالتىنساريننىڭ اعارتۋشىلىق قىرىنان بولەك، عالىم، ەتنوگراف، فولكلورشى سىندى سان قىرى بار. ءحىح عاسىردىڭ سوڭىندا قازاق دالاسىندا ميسسيونەرلەردىڭ ىقپالى كۇشەيىپ تۇرعان تۇستا قوعامداعى قىسىمعا قاراماي، مەكتەپ اشىپ، وقۋلىق جازۋىنىڭ ءوزى ۇلكەن ەرلىك. ءبىز مەكتەپ مۇعالىمدەرى مەن جاستارعا ىبىرايدىڭ اعارتۋشىلىق قىرىن اشۋعا تىرىستىق، -دەيدى دراماتۋرگ.

ال، قويۋشى رەجيسسەر فارحادبەك قانافين «17» جاستار تەاترىمەن ەكىنشى مارتە شىعارماشىلىق بايلانىس ورناتىپ وتىر. بۇعان دەيىن «تاستاماشى مەنى انا» سپەكتاكلىن ساحنالاعان.

— كورەرمەندى ءحىح عاسىرعا جەتەلەپ، قازاق دالاسىنا ى. ءالتىنساريننىڭ ءىلىم-ءبىلىمدى قانداي ەڭبەكپەن اكەلگەنىن، ونىڭ ميسسيونەرلەرمەن كۇرەسىن كورسەتۋگە كۇش سالدىق، - دەيدى ف. قانافين.

قويىلىم پرەمەراسى انشلاگپەن ءوتتى. ىبىرايدىڭ تاتار تىلىندەگى وقۋلىقتان باس تارتىپ، قازاقتىڭ بولمىسىنا ساي كىتاپ جازۋى، ءبىلىم تاراتۋ جولىنداعى كۇرەسى كورەرمەندەرگە وي سالدى.

ايتا كەتەيىك، «17» جاستار تەاترى 2018 جىلى قۇرىلعان. رەپەرتۋارىندا ونعا جۋىق سپەكتاكلى بار تەاتر، «ىبىرايدى» رەسپۋبليكانىڭ تۇكپىر-تۇكپىرىندە ساحنالاۋدى جوسپارلاپ وتىر.

پىكىرلەر