مۇنايلى اۋدانىنىڭ «قىزىلتوبە-2» تۇرعىن ءۇي ماسسيۆىندە سپورت الاڭى جوق. سوعان قاراماستان مۇنايلىلىق جاس سپورتشىلار 60 شارشى مەتر عيماراتتى كاسىبي سپورت الاڭىنا اينالدىردى. وندا ماماندار 80-نەن استام بالانى ەركىن كۇرەسكە باۋلىپ ءجۇر. بۇل تۋرالى مۇنايلى اۋدانى اكىمدىگىنىڭ ءباسپاسوز قىزمەتى حابارلادى.
«قىزىلتوبە-2» تۇرعىن ءۇي ماسسيۆىندە سپورت الاڭدارى جوق. سوندىقتان ءوزىمىز ارنايى زال اشىپ، ونى جابدىقتاپ، قىركۇيەك ايىنان بالالاردى قابىلداپ باستادىق. ءبىر بايقاعانىمىز، بالالار سپورتقا زور ىنتامەن كەلەدى. بۇلدىرشىندەردىڭ سپورتقا قىزىعۋشىلىعى جوعارى»، - دەدى جاتتىقتىرۋشى مىڭباي ءىزمۇحانوۆ.
مىڭباي ءىزمۇحانوۆ سپورت زالىن الدىمەن 38 مىڭعا جۋىق حالقى بار باسقۇدىق اۋىلىنان اشقان. كەيىن «قىزىلتوبە-2» تۇرعىن ءۇي ماسسيۆىنەن عيمارات جالداپ، ارنايى مامانداردى جۇمىسقا قابىلداعان. ماسەلەن، جاتتىقتىرۋشى بولاتبەك حناباەۆ 80 بالاعا ەركىن كۇرەستىڭ قىر-سىرىن ۇيرەتىپ جاتىر.
«بالالار سپورتتىق سەكتسيالارعا تەگىن قاتىسادى. ويتكەنى قازىر مەملەكەت تاراپىنان جەكە سپورت كلۋبتارىنا قاتىساتىن بالالارعا قارجىلاي كومەك كورسەتىلەدى. سونىڭ ەسەبىنەن كىشكەنتاي بولسا دا عيمارات جالداپ، وزگە جاتتىقتىرۋشىلاردىڭ جالاقاسىن بەرىپ وتىرمىز»، - دەدى مىڭباي ءىزمۇحانوۆ.
سپورت نىسانىنا تۇسكە دەيىن 50, تۇستەن كەيىن 30 بالا كەلىپ جاتتىعادى. 6 مەن 15 جاس ارالىعىنداعى بالالار كوپ كەلەدى. جاس جاتتىقتىرۋشى شاكىرتتەرىنىڭ اراسىنان ەل چەمپيوندارى شىعارىنا بەك سەنىمدى.
ايتا كەتەيىك، بۇدان بولەك باسقۇدىق اۋىلىنان دا سپورت الاڭى اشىلدى. وعان جۇزگە جۋىق بالا كاراتە جانە ەركىن كۇرەس سەكتسيالارىنا قاتىسادى.
