Munaıly aýdanynyń «Qyzyltóbe-2» turǵyn úı massıvinde sport alańy joq. Soǵan qaramastan munaılylyq jas sportshylar 60 sharshy metr ǵımaratty kásibı sport alańyna aınaldyrdy. Onda mamandar 80-nen astam balany erkin kúreske baýlyp júr. Bul týraly Munaıly aýdany ákimdiginiń baspasóz qyzmeti habarlady.
«Qyzyltóbe-2» turǵyn úı massıvinde sport alańdary joq. Sondyqtan ózimiz arnaıy zal ashyp, ony jabdyqtap, qyrkúıek aıynan balalardy qabyldap bastadyq. Bir baıqaǵanymyz, balalar sportqa zor yntamen keledi. Búldirshinderdiń sportqa qyzyǵýshylyǵy joǵary», - dedi jattyqtyrýshy Myńbaı Izmuhanov.
Myńbaı Izmuhanov sport zalyn aldymen 38 myńǵa jýyq halqy bar Basqudyq aýylynan ashqan. Keıin «Qyzyltóbe-2» turǵyn úı massıvinen ǵımarat jaldap, arnaıy mamandardy jumysqa qabyldaǵan. Máselen, jattyqtyrýshy Bolatbek Hnabaev 80 balaǵa erkin kúrestiń qyr-syryn úıretip jatyr.
«Balalar sporttyq sekııalarǵa tegin qatysady. Óıtkeni qazir memleket tarapynan jeke sport klýbtaryna qatysatyn balalarǵa qarjylaı kómek kórsetiledi. Sonyń esebinen kishkentaı bolsa da ǵımarat jaldap, ózge jattyqtyrýshylardyń jalaqasyn berip otyrmyz», - dedi Myńbaı Izmuhanov.
Sport nysanyna túske deıin 50, tústen keıin 30 bala kelip jattyǵady. 6 men 15 jas aralyǵyndaǵy balalar kóp keledi. Jas jattyqtyrýshy shákirtteriniń arasynan el chempıondary shyǵaryna bek senimdi.
Aıta keteıik, budan bólek Basqudyq aýylynan da sport alańy ashyldy. Oǵan júzge jýyq bala karate jáne erkin kúres sekııalaryna qatysady.
