ەل تاۋەلسىزدىگىنىڭ 30 جىلدىعى قارساڭىندا اباي اۋدانى اكىمدىگىنىڭ باستاماسىمەن «ادىلەتتى قوعام-ءتيىمدى مەملەكەت» تاقىرىبىنداعى كەزدەسۋ ءوتتى. شارانى شىمكەنت قالاسىنىڭ ىشكى ساياسات جانە جاستار ءىسى جونىندەگى باسقارماسىنىڭ ۇسىنىسى بويىنشا «شىعارماشىلىق جاستار» قوعامدىق قورى ۇيىمداستىردى.
كەزدەسۋگە جوبا كورديناتورى "شاڭىراق" قب باسشىسى سابيرا بايزاحوۆا زاڭ عىلىمدارىنىڭ دوكتورى ەرمەك بەكبوسىنوۆ سونىمەن قاتار، «مەيىرىم» قوعامدىق بىرلەستىگىنىڭ مۇشەلەرى، اباي اۋدانىنىڭ ارداگەرلەر كەڭەسىنىڭ توراعالارى مەن زيالى قاۋىم وكىلدەرى، تىل ارداگەرلەرى، اۋداننىڭ بەلسەندى ازاماتتارى قاتىستى.
ادىلەتتى مەملەكەت ورناتۋ – ادامزات بالاسىنىڭ ەرتە داۋىردەن بەرگى باستى ارمانى. سپيكەرلەر بۇگىنگى قوعامداعى الەۋمەتتىك ماسەلەلەردىڭ ءمان-جايىنا كەڭىرەك توقتالىپ، پىكىر الماستى.
-كەز كەلگەن ىستە ادىلدىك قاعيداتىن باسشىلىققا الساق، بۇعان انىق قول جەتكىزەمىز. ءبىز حالىقتىڭ الەۋمەتتىك جاعدايىن جاقسارتۋمەن قاتار، بارلىق ازاماتتاردىڭ مۇددەسىن بىردەي قورعايمىز. قورىتا ايتساق، «تاۋەلسىزدىك بارىنەن قىمبات» دەگەن ءبىر اۋىز ءسوز ماڭگى ۇرانىمىز بولۋعا ءتيىس. ءتاۋ ەتەر تاۋەلسىزدىگىمىزدى كوزىمىزدىڭ قاراشىعىنداي ساقتايىق، - دەدى "شاڭىراق" قب باسشىسى سابيرا بايزاحوۆا.
