"YouTube" پلاتفورماسىندا "ساكە" جوباسى ارقىلى تانىلعان اكىم وبرازىن سومدايتىن اكتەر، ستسەناريست رۇستەم وماروۆ اكىمدەردىڭ جيىنتىق وبرازىن قالاي جاساعانىن ايتىپ بەردى، دەپ حابارلايدى "ادىرنا" ۇلتتىق پورتالى.
"قىزىق Livە" باعدارلاماسىنا قوناق بولعان ونەر يەسى جوباداعى قىزىقتى يدەيالاردىڭ ومىردەن الىنعانىن اشىق ايتتى.
رۇستەم وماروۆتىڭ ايتۋىنشا، ول ەلدەگى اكىمدەردىڭ 70%-ىنا ءتان قاسيەتتەردى "ساكە" ينتەرنەت-حيكاياسىنداعى اكىمنىڭ وبرازىنا جيناقتاعان. ونىڭ ىشىندە ءوزى بىلەتىن بىرنەشە شەنەۋنىكتىڭ مىنەز-قۇلقى، ءىس-ارەكەتتەرى مەن ادامدىق قاسيەتتەرى دە جوبادا تولىعىمەن قامتىلعان.
- ناقتى مەنىڭ وبرازىم - الماتى وبلىسىنداعى اۋدان اكىمى. قازىر جۇمىس ىستەيتىنىن الدە ىستەمەيتىنىن بىلمەيمىن. وقيعا بىلاي بولدى. مەن ول كىسىنىڭ قابىلداۋىنا كەلدىم. مەنى حاتشى قىز قارسى الدى. كوپ وتىرىپ، كۇتتىم. كابينەتكە كىرسەم، ول كىسى مەنى تاپىشكەمەن قارسى الدى. دۇيسەنبى كۇنى بولاتىن. ول سوندا كابينەتىندە ءۇيى سەكىلدى تاپىشكەمەن ءجۇردى. مەن ول كىسىگە اۋىزسۋ ماسەلەسىمەن كەلگەن ەدىم. ءبىر اۋىلدىڭ تۇرعىندارى اۋىز سۋدى بۇلاقتان الىپ، تۇتىنادى ەكەن. ال اكىم سول بۇلاقتىڭ ورنىنا اۆتوجۋ قىزمەتىن اشىپ قويعان. ءسويتىپ، ول جەردە كولىكتەردى جۋا باستاعان. مەن بارىپ، "اعا، بۇلاي بولمايدى عوي، ادامدار بۇل جەردەن سۋ الادى", - دەدىم. سويتسەم، ول كىسى "باسقا جەردە بار عوي بۇلاق" دەيدى. قاي جەردە ەكەنىن سۇراسام: "10 كيلومەتر جەردە. ەشتەڭە ەتپەيدى، سول جاقتان السا بولادى", - دەدى. سول كەزدە-اق وسى كىسى تۋرالى كينو تۇسىرەمىن دەگەن وي كەلدى. مەنىڭ اكىمىمنىڭ 30 پايىزى سول كىسىدەن الىنعان، - دەيدى رۇستەم وماروۆ.
سونىمەن بىرگە، ول تاعى ءبىر اكىمنىڭ بەينەسى يدەياسىنا ارقاۋ بولعانىن اتاپ ءوتتى.
- ۇلكەن كونفەرەنتسيا ما، الدە قوعامدىق كەڭەس پە ءوتىپ جاتقان ەدى. جاستار وتىر. ءبىر كەزدە ول كىسى "شوۋ جاساۋ كەرەك، بىردەڭە عىپ ادامداردى تاڭعالدىرۋ كەرەك", - دەيدى. ءبارى ءۇنسىز. كەنەت اكىم "تاپتىم! مىڭ جىلقى كەرەك جانە مىڭ ستۋدەنتتى شاقىرىپ، سوعان وتىرعىزۋ كەرەك. ولاردىڭ بارلىعىنىڭ ءجۇزى جايدارى بولىپ، كۇلىپ تۇرۋى كەرەك. كوپ جانە سارى ءتۇستى كەۋدەشە كيۋى كەرەك. سول كەزدە كەنەتتەن تۋ شىعادى", - دەيدى ول. ءبىر كەزدە، "جوق، مىڭ ەمەس، ەكى مىڭ جىلقى بولۋى كەرەك!" دەپ ويىن تاعى وزگەرتتى. وسى كىسىنىڭ وبرازىن جانە تاعى ءبىر وتە دورەكى اكىمنىڭ بەينەسىن الدىم. بارلىعى شىنايى. ال كومەكشىنىڭ وبرازىن بارلىق جەردەن كورۋگە بولادى. بارلىق كومەكشىلەر وسىنداي، - دەپ تولىقتىردى ءسوزىن رۇستەم وماروۆ.
ايتا كەتەيىك، "ساكە" ۆەب-سەريالى 2020 جىلى جارىق كوردى. باستى كەيىپكەر - سايات ساماتۇلى ەسىمدى اۋدان اكىمى. سەريال مەملەكەتتىك قىزمەتكەردىڭ ءتۇرلى ءىس-ارەكەتتەرى تۋرالى. جوبا وقىرماندار تاراپىنان قولداۋعا يە بولىپ، "ساكە" وبرازى ەل اراسىندا كەڭىنەن تانىلىپ ۇلگەردى.
"ادىرنا" ۇلتتىق پورتالى
