قازاقستاندىقتار ستۋدەنتتىك جاتاقحانالار قۇرىلىسىنا ينۆەستيتسيا سالا الادى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەمە جاساپ.
جاتاقحاناداعى ورىن تاپشىلىعى ماسەلەسى بارلىق وڭىرلەر ءۇشىن وزەكتى. ستاتيستيكالىق مالىمەتتەرگە سۇيەنسەك، رەسپۋبليكا بويىنشا جاتاقحاناعا مۇقتاج ستۋدەنتتەر سانى 62 مىڭنان اسادى. جاتاقحاناعا نەگىزگى سۇرانىس الماتىدا – 22 مىڭ ورىن جانە نۇر-سۇلتاندا – 17 مىڭ ورىن.
قر بعم "قارجى ورتالىعى" اق ءباسپاسوز قىزمەتىنىڭ مالىمەتىنشە، 2021 جىلدان باستاپ مەكتەپ بىتىرۋشىلەر سانىنىڭ ايتارلىقتاي وسكەنى بايقالادى. ماسەلەن، بيىل 163 مىڭنان استام ادام مەكتەپ بىتىرسە، 2025 جىلعا قاراي بۇل كورسەتكىش 302 جەتۋى مۇمكىن.
بۇل ماسەلەنى شەشۋ ءۇشىن ءاربىر زاڭدى تۇلعا (مەملەكەتتىك مەكەمەلەردى قوسپاعاندا) ستۋدەنتتەرگە ارنالعان جاتاقحانا سالىپ، تابىس الا الاتىن مەحانيزم ازىرلەندى.
ماسەلەن، جوباعا قاتىسۋعا نيەت بىلدىرگەن قۇرىلىس سالۋشى ءوز قاراجاتىنا نىسان سالىپ، 8 جىل ىشىندە پايدالانۋعا بەرىلگەننەن كەيىن ءاربىر ناقتى العان توسەك ورىن ءۇشىن مەملەكەتتەن تولەم الادى.
مەملەكەتتىك تاپسىرىس بويىنشا تولەمدەردەن بولەك، ينۆەستوردىڭ ءوزى ءاربىر ستۋدەنت تۇرۋ ءۇشىن ورتاشا ەسەپپەن 15-20 مىڭ تەڭگە تولەم الادى (قۇنى ءوز بەتىنشە انىقتالادى).
سونداي-اق ينۆەستور ءۇشىن "قاراپايىم زاتتار ەكونوميكاسى" جانە "بيزنەستىڭ جول كارتاسى 2020-2025" ("دامۋ" قورى) شەڭبەرىندە 9%-عا دەيىنگى بانكتىك نەسيەنى سۋبسيديالاۋ جانە دايىن جوبالىق-سمەتالىق قۇجاتتامانى ۇسىنۋ (ستاندارتتى جانە جەكە جوبالار) سياقتى قوسىمشا مۇمكىندىكتەر قاراستىرىلعان.
سونداي-اق ينۆەستور كوممەرتسيالىق كەڭىستىكتەن قوسىمشا تابىس الا الادى، ياعني جاتاقحانا بازاسىندا اسحانا، شاشتاراز جانە باسقا دا شارۋاشىلىق نىساندارىن اشۋعا بولادى.
“ادىرنا” ۇلتتىق پورتالى
