سوتتالعان ايەل 10 كىتاپ وقىپ، مەرزىمىن ءۇش جىلعا قىسقارتتى، دەپ حابارلايدى "ادىرنا” ۇلتتىق پورتالى.
قاراعاندى وبلىسى بويىنشا قىلمىستىق-اتقارۋ جۇيەسى دەپارتامەنتى ءباسپاسوز قىزمەتىنىڭ حابارلاۋىنشا، ولار قاڭتار ايىندا ەرەكشە جوبا – «شەكتەۋسىز وقۋ» جوباسىن باستاعان.
جوبانىڭ ءمانى سوتتالعاندار بەلگىلى ءبىر كىتاپتى وقىپ، كەيىن تۇسىنگەنىن اڭگىمەلەۋ بارىسىندا نەمەسە ەسسە جازۋ ارقىلى ءوز بىلىمدەرىن كورسەتۋى كەرەك.
جوباعا قاتىسقانداردىڭ ءبىرى – اك-159/9 مەكەمەسىنىڭ تۇتقىنى ليديا.
«شەكتەۋسىز وقۋ» جوباسى تۋرالى ءبىلىپ، وعان العاشقىلاردىڭ ءبىرى بولىپ بەلسەنە قاتىستى.
«بىرنەشە كوركەم ادەبيەت كىتاپتارىن وقىپ، ولاردىڭ ءمانىن ءوز تۇسىنگەنىنشە جەڭىل ايتىپ بەرگەن سوڭ ول ودان ءارى جىگەرلەندى. بارلىعى 10 كىتاپ وقىپ، ەكى ىنتالاندىرۋ العان ليديا شارتتى تۇردە مەرزىمىنەن بۇرىن بوساتىلدى»، - دەدى اك-159/9 مەكەمەسى باسشىسىنىڭ ورىنباسارى نازيرا قاديروۆا.
ايەل سالىق تولەۋدەن جالتارعانى ءۇشىن 5 جىل جازاسىن وتەپ جاتقان. قاراعاندى وبلىسىنىڭ ايەلدەر كولونياسىندا ەكى جىلى ءوتتى. ليديانىڭ وسى جوباعا قاتىسىپ، جاقسى ناتيجە كورسەتكەنى ءۇشىن مەرزىمى ءۇش جىلعا قىسقارتىلىپ، قازىر بوستاندىققا شىقتى.
«مەن 216-باپ – سالىق تولەۋدەن جالتارۋ بويىنشا جازامدى وتەپ جاتىرمىن. مەن قۇرىلىس كومپانياسىندا جۇمىس ىستەپ، بەس جىلعا سوتتالدىم.جوبانى ەستىپ، جاقسى جاڭالىق ەكەنىنە قۋاندىم. ال بۇگىن شارتتى تۇردە مەرزىمىنەن بۇرىن بوساتىلدىم. مەن وسى جوبانىڭ جەتەكشىسىنە شىن جۇرەكتەن العىسىمدى بىلدىرگىم كەلەدى »، - دەدى ليديا.
«شەكتەۋسىز وقۋ» جوباسىنا قازىر 50-دەن استام سوتتالۋشى قاتىسۋدا.
“ادىرنا” ۇلتتىق پورتالى
