جامبىل وبلىسىندا 9-سىنىپ وقۋشىسى كورشىسىنىڭ ۇيىندە ءتيردىڭ مىلتىعىنا اتىلىپ ءولدى. قايعىلى جاعداي كەزىندە ءجاسوسپىرىم سول ءۇيدىڭ وزىنەن ءبىر جاس كىشى بالاسىمەن بولعان، دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ.
ەكەۋى قارۋمەن ويناپ وتىرعاندا وق اتىلىپ كەتسە كەرەك. ەندى باقداۋلەت بالقاربايدىڭ تۋىستارى مىلتىقتى قاراۋسىز قالدىرعان اۋىلداستارىن جازاعا تارتۋدى تالاپ ەتىپ وتىر.
تەسكەنتوعان اۋىلىنداعى قايعىلى جاعداي كەشە كۇندىزگى ساعات بەس شاماسىندا بولعان. اۋىلداسىنىڭ ۇيىنە كەتكەن باقتاۋلەت بالقاربايدىڭ باسىنا وق ءتيىپ اجال قۇشىپتى.
بۇگىن ونىڭ دەنەسى ءمايىتحانادان ۇيىنە جەتكىزىلدى. 14 جاستاعى مارقۇمنىڭ جاقىندارى قايعىلى جاعدايدىڭ ناقتى قالاي بولعانىن بىلمەيدى.ءتارتىپ ساقشىلارى ونىڭ باسىن تير وعى تەسىپ وتكەنىن ايتىپتى.
جاراقاتى اۋىر بالاقايدى دارىگەرلەر اجالدان اراشالاپ قالا الماعان. ال قايعىلى وقيعا بولعان ۇيدە باقداۋلەت وزىنەن ءبىر سىنىپ تومەن وقيتىن دوسىمەن ءجۇرىپتى. ەكەۋى پنەۆماتيكالىق قاۋردى ەرمەك قىلسا كەرەك. ءسويتىپ بايقاۋسىزدا شۇرىپپەسى باسىلىپ كەتىپ، ءبىر ءتۇيىر قورعاسىن باقداۋلەتتىڭ باسىن جارعان.
بالعىن بالقارباي، باقداۋلەتتىڭ اكپەسى:
- مەن جازالانۋى كەرەك دەپ ويلايمىن، نەگە بالانىڭ اتا-اناسى قارۋدى قاراۋسىز قالدىرادى، بالاعا ۇستاتادى. بۇل – ءبىر. سودان كەيىن ءوزىنىڭ بالاسىن قورعاۋ ءۇشىن بىزگە دە اۋىر. باۋىرىمىز ءوز-وزىنە قول جۇمساعانداي بولىپ قالدى. سۋيتسيد جاسادى دەگەنگە كەلتىرىپ تۇر عوي. ال قايعىلى جاعداي بولعان ءۇي يەسى پنەۆماتيكالىق مىلتىقتىڭ قولجەتىمدى جەردە تۇرعانىن جاسىرمادى. ءوزى قارۋدى كەپتەر اتۋ ءۇشىن قولدانعان ەكەن. ونىمەن بالالار وينادى دەگەن جالعان دەيدى.
جەكسەنبەك قاشقىنوۆ، تەسكەنتوعان اۋىلىنىڭ تۇرعىنى:
- قايتىس بولعان بالانىڭ اكە-شەشەسى دە كورمەگەن. ءبىز دە كورمەدىك. نە بولعانىن ءبىز بىلمەيمىز. قازىر تەرگەۋ ءجۇرىپ جاتىر، سوت ساراپتاماسى تاعايىندالعان. سودان كەيىن بەرەتىن جاۋاپتى بەرەمىز. باسقا ءسوزىمىز جوق، جاقسى.
پوليتسەيلەردىڭ مالىمەتىنشە، ەكى بالا اۋلاعا قۇس اتۋ ءۇشىن قارۋ الىپ شىققان. بىراق مىلتىق باقداۋلەت ۇستاعان كەزدە اتىلماي قالىپ، ول ۇڭعىماسىنا ۇڭىلگەن. سول ساتتە شۇرىپپە باسىلىپ كەتكەن بولۋى مۇمكىن. قازىر بۇل ءىستىڭ ءمان-جايى جان-جاقتى تەرگەلىپ جاتىر.
“ادىرنا” ۇلتتىق پورتالى
