شىمكەنتتەگى №69 ورتا مەكتەپتە جانجال شىقتى. مەكتەپكە دجينسى شالبارمەن كەلگەن وقۋشىنىڭ قولىنا مۇعالىم قالامساپ تىعىپ العان، دەپ حابارلايدى “ادىرنا” ۇلتتىق پورتالى وڭىرلىك Otyrar باسىلىمىنا سىلتەپ.
اقپارات بويىنشا، ۇستازدىڭ بۇل ارەكەتىنەن 10 جاستاعى وقۋشىنىڭ قولىندا كوگەرگەن ءىز قالعان.
زارداپ شەككەن وقۋشىنىڭ اتا-اناسى بالانىڭ فيزيكالىق عانا ەمەس، پسيحولوگيالىق جاراقات العانىن ايتتى. وقيعا بۇكىل سىنىپتىڭ كوزىنشە بولعان. جولبارىس رەنىش پەن قولىنىڭ اۋىرعانىنان مۇعالىمگە جاۋاپ بەرۋدەن قورقىپ، پارتاعا جاتىپ قالعان.
سىنىپ جەتەكشىسىنىڭ مۇنداي دورەكى ارەكەتىنە بالانىڭ ساباققا كوك ءتۇستى دجينسى شالبارمەن كەلۋى سەبەپ بولعان. الايدا مەكتەپ مەڭگەرۋشىسىنىڭ ءوزى اۋا رايىنىڭ سالقىنداۋىنا بايلانىستى بالالاردى جىلى كيىندىرۋدى، بىراق شالبار نەمەسە دجينسى مەكتەپ فورماسىمەن بىردەي تۇستە بولۋىن ەسكەرتكەن.
"ەندى ءبىز بالالاردى مەكتەپكە جىبەرۋگە قورقامىز. بۇل نە سۇمدىق؟ بۇل مۇعالىم بىزگە جاقىندا كەلدى. ول سىنىپ جەتەكشىسى بولدى. بايعۇس بالا قولى قاتتى اۋىرعانىن، پارتاعا جاتىپ، بەتىن قولىمەن جاۋىپ، اۋىرعانى باسىلعانشا ءۇنسىز شىداعانىن ايتتى. ءتىپتى مۇعالىمنىڭ كوزىنشە جىلاۋعا دا قورىققان", - دەيدى وقۋشىنىڭ اناسى.
ول ۇيگە كەلگەندە باستاپقىدا بالانىڭ وقيعا تۋرالى ءتىس جارماعانىن ايتتى.
"جەڭىنەن قان داعىن كوردىم، سودان كەيىن قالامساپ ءىزىن كوردىم. سوندا عانا ول وقيعا تۋرالى ايتىپ بەردى. ول بالا عوي. ونىڭ نە كىناسى بار؟ ول ۇيدە بەرگەن كيىمدى كيىپ باردى", - دەدى جابىرلەنۋشىنىڭ اناسى.
وقيعا 30 قاراشادا بولعان. بەلگىلى بولعانداي، №69 مەكتەپ ديرەكتورى دەنساۋلىعىنا بايلانىستى دەمالىستا. شىمكەنت قالاسىنىڭ ءبىلىم باسقارماسىنداعىلار بۇل وقيعا تۋرالى حاباردار. جابىرلەنۋشىنىڭ اناسىمەن جانە مەڭگەرۋشىمەن كەلىسسوز جۇرگىزىلىپ، جاعداي باقىلاۋدا تۇر.
ازىرگە ۆەدومستۆوداعىلار رەسمي تۇسىنىكتەمە بەرۋدەن باس تارتتى. ەسكە سالساق، قىركۇيەك ايىنىڭ باسىندا اتا-انالار سپورتتىق اياق كيىمگە تىيىم سالۋىنا بايلانىستى بىرنەشە ورتا مەكتەپ ديرەكتورىنا شاعىمدانعان بولاتىن. بالالاردان تەك كلاسسيكالىق اياق كيىم كيۋ تالاپ ەتىلدى. بۇدان كەيىن ءبىلىم باسقارماسىنىڭ باسشىسى جانات تاجيەۆا مەكتەپ فورماسىنا قويىلاتىن تالاپتاردى ناقتى ءتۇسىندىردى.
"كەشە مەن بارلىق ديرەكتورعا بالالاردىڭ كەز كەلگەن اياق كيىمدى، كروسسوۆكا نەمەسە موكاسين كيۋگە قۇقىعى بار ەكەنى تۋرالى تاعى ەسكەرتتىم. بالالار تەك كلاسسيكالىق اياق كيىم كيۋ كەرەكتىگى تۋرالى تالاپ جوق. ال مەكتەپ فورماسىنا قاتىستى تومەنگى جاعىنا كوك ءتۇستى، ۇستىنە اق ءتۇستى جەيدە، پولو فۋتبولكا كيسە دە بولادى. اياق كيىمگە قاتىستى قانداي دا ءبىر تالاپ قاراستىرىلماعان", - دەدى جانات تاجيەۆا.
