ەلىمىزدە ەڭبەك داۋىنا قاتىستى ماسەلەلەر قالاي شەشىلەدى؟ جۇمىس بەرۋشى مەن جۇمىسشىنىڭ قانداي قۇقىعى بار؟
كاسىپورىن قىزمەتكەرىنىڭ قۇقىعىن بۇزعان جۇمىس بەرۋشىگە شاعىمدانۋ ءۇشىن قايدا جۇگىنۋگە بولادى؟ مينيسترلىكتەگىلەردىڭ مالىمەتىنشە، قىزمەتتە ەڭبەك داۋى شىققان جاعدايدا نەمەسە كاسىپورىن قىزمەتكەرىنىڭ قۇقىعى بۇزىلعان جاعدايدا قىزمەتكەر مەملەكەتتىك ەڭبەك ينسپەكتسياسىنا شاعىمدانا الادى ەكەن.
مەملەكەتتىك ەڭبەك ينسپەكتسياسىنىڭ قىزمەتكەرلەرى ءوز كەزەگىندە جۇمىسكەرلەردىڭ قۇقىقتارى مەن بوستاندىقتارىن قۇرمەتتەۋ، ساقتاۋ جانە قورعاۋ، زاڭدىلىق، وبەكتيۆتىلىك، تاۋەلسىزدىك جانە جاريالىلىق قاعيداتتارى نەگىزىندە جۇمىس ىستەيدى. ال ينسپەكتسيانىڭ مىندەتى جايلى ايتاتىن بولساق، ولار - قر ەڭبەك زاڭناماسىنىڭ ساقتالۋىن مەملەكەتتىك باقىلاۋدى قامتاماسىز ەتۋ، قاۋىپسىز ەڭبەك جاعدايلارىنا قۇقىقتى قوسا العاندا، جۇمىسكەرلەردىڭ قۇقىقتارى مەن بوستاندىقتارىنىڭ ساقتالۋىن جانە قورعالۋىن قامتاماسىز ەتۋ; جۇمىسكەرلەر مەن جۇمىس بەرۋشىلەردىڭ وتىنىشتەرىن، ارىزدارىن جانە شاعىمدارىن قاراۋ. جەكە ەڭبەك داۋلارىن قاراۋ ءتارتىبى قانداي؟ قازىرگى ۋاقىتتا جەكە ەڭبەك داۋلارىن شەشۋمەن كەلىسۋ كوميسسيالارى اينالىسادى.
ال كەلىسۋ كوميسسياسى شەشىم شىعارماعان جاعدايدا ول داۋمەن سوت اينالىسادى ەكەن. سونداي-اق، كوميسياعا كەلىپ تۇسكەن ءوتىنىشتى كوميسسيا بەرىلگەن كۇنى مىندەتتى تۇردە تىركەۋگە ءتيىس ەكەنى ايتىلادى. بىراق قانداي جاعداي بولسىن، ەڭبەك داۋىن مۇندا ءوتىنىش بەرۋشىنىڭ قاتىسۋىمەن قارالۋى كەرەك. ۆەدومستۆو مالىمەتىنشە، كەلىسۋ كوميسسياسىنىڭ وكىلدەرى كەلىپ تۇسكەن ءوتىنىشتى 15 جۇمىس كۇنى ىشىندە قاراۋعا جانە داۋ تاراپتارىنا شەشىمنىڭ كوشىرمەسىن ونى قابىلداعان كۇننەن باستاپ 3 كۇن مەرزىمدە بەرۋگە مىندەتتى. مۇنىمەن قوسا، كوميسسيا شەشىمى بەلگىلەنگەن مەرزىمدە ورىندالماعان جاعدايدا، جۇمىسكەردىڭ نەمەسە جۇمىس بەرۋشىنىڭ سوتقا جۇگىنۋگە قۇقى بار ەكەنى ايتىلادى.
سونداي-اق، مينيسترلىكتەگىلەر جەكە ەڭبەك داۋلارىن قاراۋ بويىنشا بەلگىلى ءبىر مەرزىمدەردىڭ بولاتىنىن ايتادى. مىسالى، جۇمىسقا قايتا الۋ تۋرالى داۋلار تۋعان جاعدايدا - جۇمىس بەرۋشىنىڭ ەڭبەك شارتىن توقتاتۋ تۋرالى اكتىسىنىڭ كوشىرمەسى كەلىسۋ كوميسسياسىنا تاپسىرىلعان كۇننەن باستاپ ءبىر اي ىشىندە قارالۋى ءتيىس. ال قالعان باسقا ەڭبەك داۋلارى بويىنشا جۇمىسكەر نەمەسە جۇمىس بەرۋشى ءوز قۇقىعىنىڭ بۇزىلعانى تۋرالى بىلگەن نەمەسە بىلۋگە ءتيىس كۇننەن باستاپ ءبىر جىل ىشىندە شاعىمدانا الادى. جۇمىستان ايىرىلعان جاعدايداعى وتەماقى تولەمدەرى قانداي؟ قىزمەتكەر جۇمىستان ايىرىلعان جاعدايدا وتەماقى تولەمدەرى مىنانداي جاعدايلارعا بايلانىستى بەرىلەدى ەكەن.
ءبىرىنشى جاعدايدا جۇمىس بەرۋشىنىڭ باستاماسى بويىنشا ەڭبەك شارتى بۇزىلعان كەزدە، ەكىنشىسى جۇمىسكەرلەردىڭ سانى نەمەسە شتاتى قىسقارتىلعان جاعدايدا، جۇمىس بەرۋشىنىڭ باستاماسى بويىنشا ەڭبەك شارتى بۇزىلعان كەزدە قىزمەتكەرگە مىندەتتى تۇردە وتەماقى تولەنەدى. ال ءۇشىنشى جاعدايدا جۇمىس بەرۋشى ەڭبەك شارتىنىڭ تالاپتارىن ورىنداماعان جاعدايدا جۇمىسكەردىڭ باستاماسى بويىنشا ەڭبەك شارتى بۇزىلعان كەزدە ءبىر ايداعى ورتاشا جالاقى مولشەرىندە جۇمىسىنان ايىرىلۋىنا بايلانىستى وتەماقى تولەمدەرىن الا الادى. سونداي-اق، ەڭبەك، ۇجىمدىق شارتتاردا نەمەسە جۇمىس بەرۋشىنىڭ اكتىسىندە جۇمىسىنان ايىرىلۋىنا بايلانىستى وتەماقى تولەمىنىڭ نەعۇرلىم جوعارى مولشەرى كوزدەلۋى مۇمكىن ەكەنى ايتىلادى.
شەتەلدىك قىزمەتكەرگە جۇمىسقا ورنالاسۋ تالاپتارى، بەرۋ تالاپتارى جانە رۇقسات بەرۋ ۇزاقتىعى قانداي؟ ەلىمىزدە وز بەتىنشە جۇمىسقا ورنالاسقىسى شەتەلدىكتەرگە ەڭبەك جونىندەگى ۋاكىلەتتى ورگاننىڭ كۆوتاسى شەگىندە ءۇش جىلعا دەيىنگى ۋاقىت بەرىلەدى نەمەسە ۇزارتىلادى ەكەن. شەتەلدىك قىزمەتكەر نە ول ۋاكىلەتتىك بەرگەن ادام جۇمىسقا ورنالاسۋعا ارنالعان رۇقساتتى الۋ نەمەسە ۇزارتۋ ءۇشىن ەڭبەك قىزمەتىن جۇزەگە اسىراتىن جەرىندەگى ۋاكىلەتتى ورگانعا قۇجاتتاردى قوسا بەرە وتىرىپ، ءوتىنىش بەرۋى ءتيىس.
ال شەتەلدىكتى جۇمىسقا الۋ نەمەسە جۇمىسقا ورنالاستىرۋعا رۇقساتتى ۋاكىلەتتى ورگان قۇجاتتاردى قابىلداعان كۇننەن باستاپ بەس جۇمىس كۇنى ىشىندە قابىلدايدى شەتەلدىك قىزمەتكەرگە جۇمىسقا ورنالاسۋعا ارنالعان رۇقساتتى بەرۋ نەمەسە ۇزارتۋ نە بەرۋدەن نەمەسە ۇزارتۋدان باس تارتۋ تۋرالى شەشىمدى ۋاكىلەتتى ورگان قۇجاتتاردى قابىلداعان كۇننەن باستاپ 5 جۇمىس كۇنى ىشىندە قابىلدايدى.
ال ۋاكىلەتتى ورگان ءوز كەزەگىندە شەتەلدىك قىزمەتكەرگە قابىلدانان شەشىم تۋرالى ول قابىلدانعان كۇننەن باستاپ 3 جۇمىس كۇنى ىشىندە جازباشا حابارلاۋى كەرەك.
tengrinews.kz
