كليماتتىڭ وزگەرۋىنە بايلانىستى ون جىل ىشىندە دۇنيە جۇزىندە كەم دەگەندە التى قالا ءىشىنارا نەمەسە تولىعىمەن سۋ استىندا قالۋى مۇمكىن، دەپ حابارلايدى "ادىرنا" ۇلتتىق پورتالى.
مۇنداي دەرەكتەردى the India Times ينتەرنەت-باسىلىمى كليماتتىڭ وزگەرۋى جونىندەگى ۇكىمەتارالىق ساراپشىلار توبىنىڭ (مگەيك، IPCC) اقپاراتى نەگىزىندە كارتا فورماتىندا ءوز بولجامىن جاساعان Climate Central كوممەرتسيالىق ەمەس ۇيىمىنىڭ باعالاۋىنا سۇيەنە وتىرىپ كەلتىرەدى.
باسىلىمنىڭ حابارلاۋىنشا، امستەردام تەڭىز دەڭگەيىنىڭ كوتەرىلۋىنە بايلانىستى العاشقىلاردىڭ ءبىرى بولىپ سۋ استىندا قالۋى مۇمكىن. تىزىمدەگى كەلەسى جولدى يراكتاعى شاتت-ەل-اراب وزەنىنىڭ بويىندا ورنالاسقان باسرا قالاسى الدى. India Times تۇسىندىرگەندەي، قالا باتپاقتى جەرلەرمەن قورشالعان. جاڭا ورلەان (لۋيزيانا، اقش) بوگەتتەر جۇيەسىنىڭ بولۋىنا قاراماستان سۋ استىنا ءتۇسۋ قاۋپى بار. ۆەنەتسيا ءتورتىنشى ورىندا. يتاليانىڭ بۇل قالاسىندا جەر دەڭگەيى جىل سايىن 2 مم تومەندەيدى. ودان كەيىن ۆەتنامنىڭ وڭتۇستىگىندە ورنالاسقان حوشيمين قالاسى. بولجام بويىنشا، قالانىڭ شىعىس اۋداندارى مەكونگ وزەنىنىڭ جاقىن بولۋىنا بايلانىستى سۋ استىندا قالۋى مۇمكىن. باسىلىمنىڭ ءتىزىمىن ءۇندىستاننىڭ كالكۋتتا قالاسى جابادى.
The India Times مالىمەتتەرى بويىنشا، ءتىزىمدى جاساۋ كەزىندە باسشىلىققا الىنعان نەگىزگى فاكتور قورشاعان ورتانى لاستاۋدىڭ قازىرگى تراەكتورياسى بولىپ تابىلادى.
"ادىرنا" ۇلتتىق پورتالى
