2022 جىلدىڭ قاڭتارىنان باستاپ پەدوفيلدەرگە ەلەكتروندى بىلەزىك تاعىلادى. بۇل تۋرالى ىشكى ىستەر ءمينيسترى ەرلان تۇرعىمباەۆ مالىمدەدى، دەپ حابارلايدى "ادىرنا" ۇلتتىق پورتالى.
ول پروباتسيالىق باقىلاۋدى دامىتۋ ءۇشىن ەلەكتروندى بىلەزىكتەر ەنگىزىلىپ جاتقانىن اتاپ ءوتتى.
- بيىل ءبىز پيلوت رەتىندە وسى جۇمىستى باستايمىز. ءبىرىنشى كەزەكتە 2022 جىلدىڭ 1 قاڭتارىنان باستاپ ەلەكتروندى بىلەزىكتەر پەدوفيلدەرگە تاعىلادى، - دەدى تۇرعىمباەۆ ماجىلىستە وتكەن ۇكىمەت ساعاتىندا.
ودان بولەك مينيستر قازاقستاندا زورلىق-زومبىلىق ءۇشىن قىلمىستىق جاۋاپكەرشىلىك قاتاڭداتىلعانىن ەسكە سالدى. ەندى وسى قىلمىس ءۇشىن سوتتالعاندارعا مەرزىمىنەن شارتتى تۇردە بوساتۋ جانە راقىمشىلىق شارالارى قولدانىلمايدى.
ەسكە سالا كەتەيىك، بىلتىر جازدا ىشكى ىستەر ءمينيسترى ەرلان تۇرعىمباەۆ مينيسترلىك سوتتالعاندارعا ەلەكتروندى بىلەزىك ساتىپ المايتىنىن مالىمدەگەن ەدى. ول ەلەكتروندى بىلەزىكتەر وتە قىمبات ەكەنىن، ال سوتتالعانداردى قوسىمشا ارقىلى باقىلاۋعا بولاتىنىن ايتتى.
"ادىرنا" ۇلتتىق پورتالى
