اقتاۋداعى جارىلىستان قايتىس بولعاندار تۋرالى تاراعان اقپارات جالعان، دەپ حابارلايدى "ادىرنا" ۇلتتىق پورتالى.
«WhatsApp» مەسسەندجەرىندە اقتاۋدا 7 قاراشا كۇنى شامامەن ساعات 21.18-دە اقتاۋ قالاسىندا ورىن العان جارىلىس ناتيجەسىندە 14 ادام قازا تاۋىپ، 25 ادام جانساقتاۋ بولىمىنە ءتۇستى دەگەن جازبا تارادى.
ماڭعىستاۋ وبلىستىق اۋرۋحاناسىنىڭ باس دارىگەرى بۇل اقپاراتتى جوققا شىعاردى. ماڭعىستاۋ وبلىستىق اۋرۋحاناسىنىڭ باس دارىگەرى جانىبەك ءاجمۇحانوۆتىڭ مالىمەتىنشە، 7 قاراشا ساعات 23.45-گى جاعداي بويىنشا وبلىستىق اۋرۋحانانىڭ قابىلداۋ بولىمىنە جارىلىسقا قاتىستى قوڭىراۋ تىركەلمەدى.
- سونداي-اق جانساقتاۋ بولىمىنە جارىلىستان زارداپ شەككەن ناۋقاستار تۇسكەن جوق. قازىر وقيعا ورنىندا 4 بريگادا جۇمىس ىستەپ جاتىر، - دەدى ماڭعىستاۋ وبلىستىق اۋرۋحاناسىنىڭ باس دارىگەرى جانىبەك ءاجمۇحانوۆ.
ايتا كەتەيىك، جارىلىس بولعان «ايانات» ءدامحاناسىنىڭ يەسى اباي امىرەەۆتىڭ ايتۋىنشا وقيعا بولعان ۋاقىتتا كافەدە قىزمەتكەرلەر مەن قوناقتار بولماعان.
"ادىرنا" ۇلتتىق پورتالى
