قازاقستان – تاۋەلسىز ەل. سول تاۋەلسىزدىك جولىندا ەلىمىز باسىنان تالاي ناۋبەتتى – ازاپتى دا، اشتىقتى دا، سۇم سوعىستى دا وتكەردى. «وتكەنىمىزدى ۇمىتساق، بولاشاق ءبىزدى كەشىرمەيدى» دەگەن ۇلى بابالارىمىز.
قازىرگى تاڭدا تاۋەلسىزدىك – بارشامىزعا ەرەكشە قاسيەتتى كۇن. بىرلىك، ىنتىماقتاستىق پەن تاتۋلىق كۇنى. ەلىمىزدىڭ تاۋەلسىزدىگى حالقىمىزدىڭ باقىتى، عاسىرلار بويى اڭساعان ارمانى. ۇلى دالامىزدى نايزانىڭ ۇشىمەن، بىلەكتىڭ كۇشىمەن قورعاپ كەلگەن باتىر، كورەگەن، دانا بابالارىمىزدىڭ رۋحىنا تاعزىم ەتۋ جانە تامىرى تەرەڭدە جاتقان ءتول تاريحىمىزدان تاعىلىم الۋ ءۇشىن قازاقستان رەسپۋبليكاسىنىڭ 30 جىلدىعىنا وراي قازۇۋ-نىڭ «پەداگوگيكا جانە ءبىلىم ءبىلىم بەرۋ مەنەدجمەنتى» كافەدراسىنىڭ دوتسەنتى روزا قاسىموۆانىڭ جەتەكشىلىگىمەن «قازاق فيلولوگياسى» ماماندىعىنىڭ 1-كۋرس ماگيسترانتتارى «ۇلتتىڭ ۇلى باقىتى – تاۋەلسىزدىك!» اتتى ZOOM پلاتفورماسى ارقىلى ونلاين تۇردە اشىق تاربيە ساعاتىن وتكىزدىك. اتالمىش شاراعا قازۇاۋ-دىڭ «كاسىپتىك وقىتۋ» كافەدراسىنىڭ پروفەسسورى ەلميرا امانگەلدىقىزى، «قازاق ءتىلى مەن ادەبيەتى» ماماندىعىنىڭ 1-كۋرس ماگيسترانتتارى مەن باكالاۆر ستۋدەنتتەرى قاتىستى.
ماگيسترانتتارعا تاۋەلسىزدىك، بوستاندىق، ەركىندىك ۇعىمدارىنىڭ تاريحي ماڭىزىن تۇسىندىرۋگە، تۋعان حالقىنىڭ تاريحىن قۇرمەتتەۋگە، وتانسۇيگىشتىككە باۋلي وتىرىپ، پاتريوتتىق رۋحتا تاربيەلەۋ ماقساتىندا وتكەن ءىس-شارا تاريحي وقيعالار تىزبەسى مەن تاۋەلسىزدىك العاننان كەيىنگى قول جەتكىزگەن جەتىستىكتەردى بولىسۋمەن جالعاستى.
ءاربىر تاريح كەزەڭى تاقىرىپقا ساي بەينەباياندارمەن، فوتوسۋرەتتەرمەن، ماگيسترانتتاردىڭ «اداي»، «القيسسا» كۇيلەرى مەن «جەلتوقسان جەلى»،«اتامەكەن» انىمەن ارلەنىپ، ءار ءتۇرلى قىسقا مەتراجدى روليكتەرمەن كوركەمدەلىپ وتىردى. سونداي-اق، اشىق ساباق بارىسىندا مەن دە ءوزىمنىڭ شىعارماشىلىعىمنان «تاۋەلسىزدىككە تاعزىم!» اتتى ارناۋ ولەڭىمدى وقىدىم.
تاريحتان بىلەم،
سانامدا وشپەي كەلەدى،
بابالارىمنىڭ جاساعان ەرلىك، ەرەنى
قانشاما جىلدار، قانشاما ۋاقىت وتسە دە،
ماڭگىلىك بىزگە اسقاق رۋحىن بەرەدى.
ۇلىقتاماساق ۇرپاعى بولار بىزگە سىن،
وشپەس ەرلىگىن ۇمىتىپ قالاي كەتەرسىڭ.
ەلىن شىن ءسۇيىپ، قان توككەن اسىل بوزداقتار،
مارتەبەلەرىڭدى جاراتقان ءوزى كوتەرسىن.
ازاتتىق الىپ، قالدىق قوي ءبىراز جايلانىپ،
جۇرەيىك اركەز بەس قارۋىمىزدى سايلانىپ.
تىلەگىم مەنىڭ قۇت قونعان مىنا ەلىمە
كەلمەسىن سوعىس، كەلمەسىن سوعىس اينالىپ.
شۇكىرلىك ەتەم،
ەتپەسەم ءسىرا، ۇيات-تى،
ارايلى اق تاڭ،
شۋاعىن شاشىپ ءجيى اتتى.
تاۋەلسىز، ازات، ماڭگىلىك،
اسپانى اشىق ەلىمە،
بابالارىم دا ريزا بوپ جاتقان سياقتى.
شارا سوڭىندا جينالعان قاۋىم تاريحىمىزعا دەگەن قىزىعۋشىلىعى مەن سۇيىسپەنشىلىگى ارتا تۇسكەنىن جەتكىزىپ، ونەرپازدارىمىز بەن ماگيسترانتتارعا قىزۋ قولداۋ ءبىلدىردى.
اسەم مامەجانوۆا،
فيلولوگيا فاكۋلتەتىنىڭ "قازاق فيلولوگياسى"
ماماندىعىنىڭ 1-كۋرس ماگيسترانتى.
