ق.توقاەۆ ريم پاپاسىن قازاقستانعا شاقىردى

2009
Adyrna.kz Telegram

ماۋلەن اشىمباەۆ پرەزيدەنت قاسىم-جومارت توقاەۆتىڭ اتىنان پونتيفيككە الەمدىك جانە ءداستۇرلى دىندەر كوشباسشىلارىنىڭ VII سەزىنە قاتىسۋعا شاقىرۋدى تابىس ەتتى، دەپ حابارلايدى "ادىرنا" ۇلتتىق پورتالى سەناتتىڭ ءباسپاسوز قىزمەتىنە سىلتەمە جاساپ.

ۆاتيكانعا ساپارى بارىسىندا قازاقستان پارلامەنتى سەناتىنىڭ توراعاسى ماۋلەن اشىمباەۆ ريم پاپاسى فرانتسيسكپەن كەزدەستى. ول 2003 جىلى نۇرسۇلتان نازارباەۆ الەمدىك جانە ءداستۇرلى دىندەر ليدەرلەرىنىڭ سەزىن شاقىرۋ تۋرالى باستاما كوتەرگەنىن ايتتى. ءوز كەزەگىندە قازاقستان پرەزيدەنتى قاسىم-جومارت توقاەۆ كونگرەسس حاتشىلىعىنىڭ مەڭگەرۋشىسى رەتىندە بۇل تۇعىرنامانى ناسيحاتتاۋعا ۇلەس قوستى.

م.اشىمباەۆ ۆاتيكانعا ەلىمىزدىڭ بۇل باستاماسىن قولداعانى ءۇشىن العىسىن ءبىلدىردى.

– 18 جىل ىشىندە قازاقستاندىق دىنارالىق فورۋم وكىلدى ديالوگ الاڭىنا اينالدى. وسى مۇمكىندىكتى پايدالانا وتىرىپ، قازاقستاننىڭ باستاماسىن قولداعانى ءۇشىن قاسيەتتى تاق يەسىنە العىسىمدى بىلدىرگىم كەلەدى. كاتوليك شىركەۋىنىڭ جوعارى لاۋازىمدى وكىلدەرى الەمدىك جانە ءداستۇرلى دىندەر كوشباسشىلارىنىڭ بارلىق التى سەزىنە بەلسەندى قاتىستى، — دەپ اتاپ ءوتتى سەنات توراعاسى.

سەزدە الەمدىك جانە ءداستۇرلى دىندەر كوشباسشىلارىنىڭ پاندەميادان كەيىنگى كەزەڭدەگى ادامزاتتىڭ الەۋمەتتىك جانە رۋحاني دامۋىنداعى ءرولىن تالقىلاۋ جوسپارلانۋدا.

– پاندەميا ادامزاتتىڭ كوپتەگەن سوزىلمالى ماسەلەلەرىن – كەدەيشىلىكتى، تەڭسىزدىكتى، كوپتەگەن ەلدەردەگى دەنساۋلىق ساقتاۋ جۇيەسىنىڭ ايانىشتى جاعدايىن، ادامداردىڭ ءبىلىم دەڭگەيىنىڭ تومەندىگىن، ەكولوگيالىق جانە باسقا دا پروبلەمالاردى ۋشىقتىردى. سونىمەن قاتار، پاندەميادان كەيىنگى كەزەڭدە تۇتىنۋشىلىق سالا قايتا قارالىپ، رۋحاني-ادامگەرشىلىك قۇندىلىقتار ءبىرىنشى ورىنعا شىعۋى ءتيىس ەكەنى انىق، – دەدى ماۋلەن اشىمباەۆ.

ريم پاپاسى فرانتسيسك قاسىم-جومارت توقاەۆقا كەلەسى قىركۇيەكتە قازاقستاندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە شاقىرعانى ءۇشىن العىس ايتتى.

كەزدەسۋدە سونىمەن قاتار حالىقارالىق كۇن تارتىبىندەگى نەگىزگى ماسەلەلەر، اتاپ ايتقاندا اۋعانستانداعى جاعداي، جاھاندىق كليماتتىڭ وزگەرۋى جانە ت.ب. ءسوز بولدى.

سول كۇنى ماۋلەن اشىمباەۆ ۆاتيكاننىڭ مەملەكەتتىك حاتشىسى پەترو پارولينمەن كەزدەستى. كەزدەسۋ بارىسىندا قوس تاراپ قازاقستان مەن ۆاتيكان اراسىنداعى ىنتىماقتاستىق ماسەلەلەردى تالقىلادى. سونداي-اق پاپانىڭ كونفەسسياارالىق ديالوگ جونىندەگى كەڭەسىنىڭ پرەزيدەنتى كاردينال ميگەل انحەل ايۋسو گيكسوتپەن كەزدەسۋ وتكىزىلدى.

 

"ادىرنا" ۇلتتىق پورتالى

پىكىرلەر