2021 جىلعى 5 قاراشادا شىمكەنت قالاسىندا «اكەلەر وداعى» رقب قالا اكىمدىگىمەن بىرلەسىپ قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ جانە بۇۇ-نىڭ قازاقستانداعى حالىق قونىستانۋى سالاسىنداعى قورىنىڭ (يۋنفپا) قولداۋىمەن «اكەگە قاراپ ۇل وسەر» اتتى VI رەسپۋبليكالىق اكەلەر فورۋمى وتكىزىلدى.
مەملەكەت باسشىسى قاسىم-جومارت توقاەۆ وتباسى ينستيتۋتىن نىعايتۋ ماسەلەسىنە ەرەكشە كوڭىل بولۋدە. قازاقستان رەسپۋبليكاسىندا مەملەكەتتىك وتباسىلىق ساياسات ۇلتتىق ستراتەگيالىق باسىمدىقتار مەن مىندەتتەرگە سايكەس ىسكە اسىرىلىپ وتىر. قازاقستان رەسپۋبليكاسىنىڭ وتباسىلىق جانە گەندەرلىك ساياسات تۇجىرىمداماسىندا ەلىمىزدە اكە ينستيتۋتىن كۇشەيتۋ كوزدەلگەن.
اكەلەر فورۋمىنىڭ جۇمىسىنا پارلامەنت دەپۋتاتتارى، ۇلتتىق كوميسسيا مۇشەلەرى، ورتالىق مەملەكەتتىك جانە جەرگىلىكتى اتقارۋشى ورگانداردىڭ وكىلدەرى، قوعام قايراتكەرلەرى، ۇەۇ، سونداي – اق اتا-انالار قوعامداستىعىنىڭ وكىلدەرى - وڭىرلەردەن كەلگەن دەلەگاتتار قاتىستى.
شىمكەنت قالاسىنىڭ اكىمى مۇرات ايتەنوۆ، قر پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى، پارلامەنت سەناتىنىڭ دەپۋتاتى ل.سۇلەيمەن، اقپارات جانە قوعامدىق دامۋ ۆيتسە-ءمينيسترى ا. وماروۆ، بۇۇ-نىڭ قازاقستانداعى حالىق قونىستانۋى سالاسىنداعى قورىنىڭ (يۋنفپا) اتقارۋشى وكىلى ر. سيسەماليەۆ قۇتتىقتاۋ ءسوز سويلەدى.
فورۋم مودەراتورى پارلامەنت ءماجىلىسىنىڭ دەپۋتاتى، پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى باقىتبەك سماعۇل ءىس-شارانى اشا وتىرىپ، «بۇگىن دە اكە تاربيەسىندەگى اكەنىڭ ءرولىن ارتتىرۋ، اكە ينستيتۋتىن نىعايتۋ پروبلەماسىنا قوعامنىڭ نازارىن اۋدارۋ ماسەلەلەرى ەڭ الدىمەن بالالاردىڭ بويىندا پاتريوتتىق سەزىمدى، رۋحاني-ادامگەرشىلىك قۇندىلىقتاردى قالىپتاستىرۋ ماسەلەلەرىمەن ءوزارا بايلانىستى بولۋعا ءتيىس. كۇشتى وتباسىنىڭ قالىپتاسۋىندا، بالالاردى تاربيەلەۋ مەن دامىتۋدا، ەرلەردىڭ مىنەز-قۇلقىن قالىپتاستىرۋدا اكەلەر ۇلكەن ءرول اتقارادى».
فورۋم قاتىسۋشىلارىنا قوعامدىق پىكىردى زەرتتەۋ ورتالىعى جۇرگىزگەن «ەرلەردىڭ ءرولى، ولاردىڭ قازاقستانداعى وتباسىلىق ومىرگە جانە بالالاردى تاربيەلەۋگە قاتىسۋ دارەجەسى» اتتى ۇلتتىق الەۋمەتتىك زەرتتەۋدىڭ ناتيجەلەرى ۇسىنىلدى. زەرتتەۋمەن قازاقستاننىڭ بارلىق 17 ءوڭىرى قامتىلعان، وندا وتباسىلىق ەرلەر مەن ايەلدەر، جالعىز باستى، ءوز بەتىنشە بالا تاربيەلەپ وتىرعان اكەلەرمەن، سونداي-اق قوعامدىق بىرلەستىكتەر مەن مەملەكەتتىك ورگاندار وكىلدەرىنىڭ ساراپشىلارىمەن سۇحبات جۇرگىزىلدى.
«وتباسى جانە ءدىن»، «وتباسىلىق تاربيەدە اكەنىڭ ءرولىن ارتتىرۋ»، «قازاقستاندا وتباسى ينستيتۋتىن قالىپتاستىرۋعا باق پەن بلوگەرلەردىڭ اسەرى»، «بالالارعا سپورتتىق تاربيە بەرۋ»، «مەكتەپتەردە اكەلەر كەڭەسىن دامىتۋ»، «ەرەكشە بالالاردىڭ ەرەكشە اكەلەرى»، «بالالاردى تاربيەلەۋدەگى كىتاپتاردىڭ ءرولى» تاقىرىپتارىندا بەلسەندى پىكىرتالاستار ءوتتى.
فورۋم سپيكەرلەرى – قازاقستان مۇسىلماندارى ءدىني باسقارماسىنىڭ، قازاقستان حالقى اسسامبلەياسىنىڭ وكىلدەرى، ورتالىق جانە جەرگىلىكتى اتقارۋشى ورگانداردىڭ، ۇەۇ، سپورت كلۋبتارىنىڭ، عىلىمي قوعامداستىقتىڭ، حالىقارالىق ۇيىمداردىڭ وكىلدەرى، باق سالاسىنداعى ساراپشىلار، وتباسى مەن بالالار پروبلەمالارىن جاريا ەتەتىن بلوگەرلەر، سونداي-اق وڭىرلەردەن كەلگەن دەلەگاتتار وسى پروتسەستە وتباسى مەن مەكتەپتىڭ بايلانىسىن نىعايتۋ جانە اتا-انالار قوعامداستىعىمەن بىرلەسكەن جۇمىستى كۇشەيتۋ قاجەتتىلىگى تۋرالى پىكىردى ءبىراۋىزدان ءبىلدىردى.
فورۋم وسكەلەڭ ۇرپاقتى تاربيەلەۋدىڭ وزەكتى ماسەلەلەرىن شەشۋ بويىنشا ورتالىق جانە جەرگىلىكتى اتقارۋشى ورگاندارعا ارنالعان ناقتى ۇسىنىستاردى اتاپ وتۋمەن اياقتالدى.
ءىس-شارا سوڭىندا وڭىرلەردەن كەلگەن دەلەگاتتارعا جەكە ۇلگى رەتىندە جانە اكە ينستيتۋتىن دامىتۋعا قوسقان ۇلەسى ءۇشىن ۇلتتىق كوميسسيانىڭ اتىنان العىس حاتتار تابىس ەتىلدى.
"ادىرنا" ۇلتتىق پورتالى
