قر پرەمەر-ءمينيسترى ءاليحان سمايىلوۆ شىمكەنت قالاسىنا جۇمىس ساپارىمەن كەلدى. ساپار اياسىندا مەملەكەت باسشىسى تاپسىرماسىنىڭ جەرگىلىكتى جەردە ورىندالۋ بارىسىمەن تانىسىپ، بىرقاتار نىسانداردى ارالاۋ جوسپارلانعان.
ۇكىمەت باسشىسى الدىمەن قالاداعى زاماناۋي ساۋدا-لوگيستيكالىق ورتالىققا باردى. قالا اكىمى م.ايتەنوۆ شاhاردا يندۋستريالىق ايماقتاردى دامىتۋ، ساۋدا-لوگيستيكالىق ورتالىقتى كەڭەيتۋ جۇمىستارىنىڭ بارىسىنان حاباردار ەتتى.
بۇگىندە ورتالىقتىڭ قۋاتتىلىعى جىلىنا 1 ميلليون توننا تاۋاردى قابىلداپ الۋعا، ساقتاۋعا جانە جونەلتۋگە مۇمكىندىك بەرەدى. مەملەكەت باسشىسىنىڭ تاپسىرماسىنا سايكەس، ساۋدا-لوگيستيكالىق ورتالىقتى كەڭەيتۋ، وعان قاجەتتى ينفراقۇرىلىم جۇيەلەرىن تارتۋ جۇرگىزىلۋدە. 2023-2027 جىلدارى 136 گا اۋماققا 10 جوبانى ىسكە اسىرۋ جوسپارلانۋدا.
ۇكىمەت باسشىسى شىمكەنت قالاسىنداعى اتالعان ساۋدا-لوگيستيكالىق ايماقتى كەڭەيتۋ ارقىلى قازاقستاننىڭ بۇكىل وڭتۇستىك ءوڭىرىن قامتيتىن وڭىرلىك حاب قۇرۋدىڭ مۇمكىندىگى زور ەكەنىن اتاپ ءوتتى.
- يندۋستريالدى ايماقتاردى كەڭەيتۋ جاڭا جوبالاردى ىسكە اسىرۋعا مۇمكىندىك بەرەدى. بۇگىندە ونەركاسىپ ءونىم كولەمىن ارتتىرۋ وتە ماڭىزدى. ساۋدا-لوگيستيكالىق ورتالىقتى كەڭەيتۋگە، شىمكەنت قالاسىنىڭ وڭىرلىك حابقا اينالۋىنا بارلىق مۇمكىندىگى بار. ول باعانى تومەندەتىپ، ىشكى نارىقتى تاۋارلارمەن قامتاماسىز ەتۋ بويىنشا ەكونوميكاعا وڭ اسەرىن تيگىزەدى. ۇكىمەت تاراپىنان قانداي كومەك كەرەك بولسا، ءبىز قولداۋعا دايىنبىز، - دەدى ءا.سمايىلوۆ.
جالپى، بۇگىندە شىمكەنت قالاسىندا جاڭادان 4 وندىرىستىك الاڭ قۇرۋ بويىنشا بەلسەندى جۇمىس جۇرگىزىلۋدە. وندا جالپى قۇنى 459 ميلليارد تەڭگەنى قۇرايتىن 121 ينۆەستيتسيالىق جوبا ىسكە اسىرىلادى دەپ جوسپارلانعان.
