شىمكەنتتە مەملەكەت باسشىسى قاسىم-جومارت توقاەۆتىڭ جاڭعىرتۋ كۇن تارتىبىنە ارنالعان «رەفورمالار ءمانى: قازاقستاننىڭ بولاشاق تاريحىنىڭ جەتى تاراۋى» اتتى كىتاپتىڭ تانىستىرىلىمى ءوتتى.
ءىس-شارا بارىسىندا كىتاپ اۆتورى، مەملەكەت جانە قوعام قايراتكەرى ماۋلەن اشىمباەۆ ءوڭىردىڭ عىلىمي جانە شىعارماشىلىق زيالى قاۋىم وكىلدەرىمەن، ساراپشىلارمەن جانە قوعام بەلسەندىلەرىمەن بىرگە مەملەكەت باسشىسىنىڭ باستاماسىمەن ەلىمىزدە جۇزەگە اسىرىلىپ جاتقان ساياسي، ەكونوميكالىق جانە الەۋمەتتىك وزگەرىستەردىڭ نەگىزگى باعىتتارىن تالقىلادى. سونداي-اق ساپار اياسىندا ماۋلەن اشىمباەۆ جەرگىلىكتى بوچچا فەدەراتسياسىنىڭ وكىلدەرىمەن جانە ءوڭىر جاستارىمەن كەزدەستى.
كىتاپتىڭ تانىستىرىلىمى م.اۋەزوۆ اتىنداعى وڭتۇستىك قازاقستان زەرتتەۋ ۋنيۆەرسيتەتىندە ءوتتى. كەزدەسۋ بارىسىندا اۆتور مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىرىلىپ جاتقان رەفورمالاردىڭ تاريحي ماڭىزى مەن ەل بولاشاعىنا ىقپالى تۋرالى ءوز پايىمىن ورتاعا سالدى.
كىتاپتا مەملەكەتتىك باسقارۋدى جاڭعىرتۋ، ساياسي جانە ەكونوميكالىق وزگەرىستەر، وڭىرلىك دامۋ، ۇلتتىق بىرەگەيلىك، سونداي-اق قازاقستاننىڭ حالىقارالىق ارەناداعى ورنى مەن بەدەلىن ايقىنداۋ ماسەلەلەرى قاراستىرىلادى.
ماۋلەن اشىمباەۆ ءوز سوزىندە پرەزيدەنت رەفورمالارىنىڭ ءمانى مەن مازمۇنىن اشاتىن بىرقاتار نەگىزگى ماسەلەگە توقتالدى.
«ادىلەتتى قازاقستان» يدەياسىنىڭ تۇپكى ءمانى – «مەملەكەت مەملەكەت ءۇشىن» دەگەن تۇسىنىكتەن «مەملەكەت ادام ءۇشىن» قاعيداتىنا تۇبەگەيلى بەت بۇرۋ. ەل دامۋىنىڭ جاڭا پاراديگماسىنىڭ نەگىزىندە ادام جانە ونىڭ مۇددەلەرى تۇر. بۇل ۇستانىم جاڭا كونستيتۋتسيادا ناقتى كورەتىلگەن»، – دەدى ماۋلەن اشىمباەۆ.
اۆتور كونستيتۋتسيادا بەكىتىلگەن قۇندىلىقتار ەلىمىزدىڭ ۇزاق مەرزىمدى دامۋ ماقساتتارىن ايقىندايتىنىن دا اتاپ ءوتتى.
سونىمەن قاتار كەزدەسۋگە قاتىسۋشىلار ەلدىڭ تەحنولوگيالىق الەۋەتىن نىعايتۋ جانە تسيفرلىق دامۋدىڭ جاڭا مۇمكىندىكتەرىن ءتيىمدى پايدالانۋ ماسەلەلەرىن تالقىلادى. ماۋلەن اشىمباەۆتىڭ ايتۋىنشا، جاھاندىق وزگەرىستەر قازاقستان ءۇشىن جاڭا مۇمكىندىكتەرگە جول اشادى. مۇنداي جاعدايدا الەمدە بولىپ جاتقان ۇدەرىستەردەن شەت قالماي، ولاردىڭ بەلسەندى قاتىسۋشىسىنا اينالۋ ماڭىزدى.
شىمكەنتكە ساپارى اياسىندا ماۋلەن اشىمباەۆ «مەتاللۋرگ» سپورت كەشەنىنە بارىپ، وڭىرلىك بوچچا قۇراماسىنىڭ سپورتشىلارىمەن كەزدەستى. ول جاتتىعۋ بارىسىمەن تانىسىپ، پاراسپورتشىلارمەن، مۇگەدەكتىگى بار بالالاردىڭ اتا-انالارىمەن جانە جاتتىقتىرۋشىلار قۇرامىمەن ينكليۋزيا مادەنيەتىن ىلگەرىلەتۋ ماسەلەلەرىن تالقىلادى.
كەزدەسۋدە ماۋلەن اشىمباەۆ شىمكەنتتىك سپورتشىلاردىڭ جەتىستىكتەرىنە توقتالىپ، سوڭعى ەكى جىلدا قالادا بوچچا سپورتىمەن اينالىسۋشىلار سانى ەداۋىر ارتقانىنا نازار اۋداردى. وڭىرلىك كوماندانىڭ وكىلدەرى رەسپۋبليكالىق جارىستارعا بەلسەندى قاتىسىپ، جۇلدەلى ورىندارعا يە بولىپ ءجۇر. سونداي-اق، شىمكەنتتە ينكليۋزيۆتى سپورت ورتالىعىنىڭ سالىنۋى سپورتشىلاردىڭ تۇراقتى جاتتىعۋىنا جانە جارىستارعا دايىندالۋىنا قوسىمشا مۇمكىندىكتەر اشاتىنى ايتىلدى.
«ارالارىڭىزدان ۇلتتىق قۇرامانىڭ بولاشاق مۇشەلەرى مەن حالىقارالىق جارىستاردىڭ جەڭىمپازدارى شىعاتىنىنا سەنىمدىمىن. ءبىز الداعى ۋاقىتتا دا سىزدەرگە قولداۋ كورسەتە بەرەمىز. جاتتىقتىرۋشىلارىڭىزبەن بىرلەسىپ، ەل نامىسىن حالىقارالىق ارەنادا لايىقتى قورعاۋلارىڭىز ءۇشىن قاجەتتى جاعدايلار جاساۋ باعىتىندا جۇمىس ىستەيمىز»، – دەدى ماۋلەن اشىمباەۆ.
شىمكەنتكە ساپار دوستىق ۇيىندە ماۋلەن اشىمباەۆتىڭ قالا جاستارىمەن كەزدەسۋىمەن تۇيىندەلدى. اشىق ديالوگ فورماتىندا قاتىسۋشىلار مەملەكەت باسشىسىنىڭ باستاماسىمەن جۇزەگە اسىرىلىپ جاتقان رەفورمالاردىڭ وسكەلەڭ ۇرپاققا بەرەتىن مۇمكىندىكتەرىن، جاستاردىڭ ەلدەگى وزگەرىستەرگە قاتىسۋىن جانە قوعام الدىنداعى جاۋاپكەرشىلىگىن تالقىلادى.
