تۇركىمەنستاندا حالىقتى قىزىلشا مەن ماقتا تەرۋگە ماجبۇرلەپ، ۇرىپ-سوعۋدا

2629
Adyrna.kz Telegram

تۇركىمەنستاندا بەتپەردە رەجيمىن بۇزعان ادامدار، سونداي-اق تۇرمىستىق قىزمەت پەن اليمەنت بويىنشا قارىزى بارلار ماقتا مەن قىزىلشا تەرۋگە ءماجبۇرلى تۇردە جىبەرىلەدى. ودان باس تارتقانداردى پوليتسەيلەر سوققىعا جىعادى. بۇل تۋرالى «ازاتتىق» راديوسىنىڭ تۇركىمەن قىزمەتى حابارلادى.

"قازىر بەرەكەت جانە سەردار ايماعىنداعى بەتپەردەسىز ۇستالعان ازاماتتاردى، سونداي-اق ەلەكتر جارىعى مەن گازعا قارىزى بار، اليمەنت بويىنشا بەرەشەگى بار ازاماتتاردى ماقتا مەن قىزىلشا تەرۋگە ماجبۇرلەپ جىبەرەدى. پوليتسەيلەر ماقتا مەن قىزىلشا تەرۋگە ماجبۇرلەۋ ءۇشىن ولارعا كۇش كورسەتىپ، ۇرىپ-سوعىپ جاتىر»، - دەپ جازادى باسىلىم كۋاگەرلەردىڭ ءبىرىنىڭ ءسوزىن.

بيىلعى ماۋسىمدا تۇرعىنداردىڭ ايتۋىنشا، ەگىس القاپتارىندا ماقتا جوقتىڭ قاسى. قازىرگى ۋاقىتتا ۆەلاياتتا جوسپاردىڭ 21 پايىزى عانا ورىندالعان. بالقان ۆەلاياتىندا بيىل ماقتا جيناۋ ماۋسىمى 8 قىركۇيەكتە باستالدى. وعان رەسپۋبليكا بويىنشا 1,25 ميلليون توننا ماقتانىڭ 10 مىڭ تونناسىن جيناۋ مىندەتى جۇكتەلگەن.

تۇركىمەنستاندا ءماجبۇرلى ەڭبەك ماقتا تەرۋ ءۇشىن عانا ەمەس، ونى ءوسىرۋ ءۇشىن دە قولدانىلادى. تامىز ايىندا ازاتتىقتىڭ تۇركىمەن قىزمەتى دارعانات ايماعىنداعى ورتا مەكتەپ مۇعالىمدەرىنىڭ ماقتا وڭدەۋگە جىبەرىلگەنىن حابارلاعان ەدى. حالىقارالىق قۇقىق قورعاۋ ۇيىمدارى تۇركىمەنستاندى ماقتا وندىرىسىندە ءماجبۇرلى جانە بالالار ەڭبەگىن پايدالاندى دەپ سىناۋدا. Responsible Sourcing Network سايتىنىڭ حابارلاۋىنشا، 2021 جىلدىڭ 10 تامىزىنا دەيىن 138 جاھاندىق برەند حالىقارالىق ناۋقانعا قوسىلىپ، تاۋار وندىرىسىندە تۇرىكمەن ماقتاسىن قولدانباۋ تۋرالى كەلىسىمگە قول قويعان.

"ادىرنا" ۇلتتىق پورتالى

پىكىرلەر