سوڭعى اپتادا Stopfake.kz پورتالىنىڭ قارالىمى 66 مىڭنان استى. ەلوردادا ءوتىپ جاتقان قازاقتىلدى كونتەنت جاساۋشىلاردىڭ ءداستۇرلى فورۋمىندا «ينفودەميا» ماسەلەسىن قوزعاعان قر اقپارات جانە قوعامدىق دامۋ ءمينيسترى ايدا بالاەۆا وسىنداي مالىمەت ايتتى، حابارلايدى «ادىرنا» ءتىلشىسى قازاقپاراتقا سىلتەمە جاساپ.
«بۇگىنگى عالامدىق تسيفرلاندىرۋ زامانىندا ينتەرنەت الەمدىك ءداستۇرلى مەديانىڭ وزگەرۋىنە زور ىقپال ەتىپ جاتقانى بەلگىلى. بۇل اسىرەسە، بىلتىر ورىن العان پاندەميا كەزىندە ايقىن ءبىلىندى. ءتۇرلى الەۋمەتتىك جەلىلەر، «WhatsApp»، «Telegram-ارنالار»، «YouTube» پەن «تik-توك» قوسىمشالاردان تاراعان جالعان اقپاراتتاردان قوعامدا «ينفودەميا» ماسەلەسى وزەكتى تاقىرىپقا اينالدى. سوندىقتان ءبىز دەر كەزىندە شەشىم قابىلداپ، Stopfake.kz پورتالىن ىسكە قوستىق.
قازاق جانە ورىس تىلدەرىندە حابار تاراتاتىن سايت بۇگىنگە دەيىن قوعامدى ابىگەرگە سالعان 2 مىڭعا جۋىق فەيك اقپاراتتى جوققا شىعاردى. سوڭعى اپتاداعى سايتتىڭ قارالىمى 66 مىڭنان اسادى. بۇل ورايدا، بۇگىنگى جۋرناليستەر «فاكتچەكينگ» تالابىن ۇنەمى ەستە ۇستاۋى قاجەت»، -دەدى ۆەدومستۆو باسشىسى.
ونىڭ پايىمىنشا، ينتەرنەت سايتتاردىڭ مىندەتى تەك اقپارات بەرۋ ەمەس. ينتەرنەت – جالپى قوعامدىق پىكىر قالىپتاستىراتىن ىقپالدى قۇرال.
«بۇقارالىق اقپارات قۇرالدارىنداعى ءونىم ساپاسىنا قاتىستى كوكەيتەستى ماسەلەلەر ءبىرىنشى كەزەكتە تىلشىلەر قاۋىمىنىڭ – ءجۋرناليستىڭ ءبىلىم-بىلىگىنە بايلانىستى ەكەنى تۇسىنىكتى.
بۇل بۇگىندە ەلىمىزدەگى قازاق جانە ءورىستىلدى مەدياعا ورتاق تالاپ. بۇل ورايدا، ءبىزدىڭ مينيسترلىك تىلشىلەردىڭ ءبىلىمىن كوتەرىپ، اسىرەسە سالالىق جۋرناليستيكانىڭ دامۋىنا ارنالعان كەشەندى جۇمىستاردى قولعا الدى. بۇگىنگە دەيىن مەديتسينا، ءدىن، ەكولوگيا سالالارى بويىنشا 4 مىڭنان استام جۋرناليست ارنايى وقىتۋ كۋرستارىنان ءوتتى. بۇل باعىتتاعى جۇمىستار الداعى ۋاقىتتا جۇيەلى جالعاساتىن بولادى»، – دەدى مينيستر.
«ادىرنا» ۇلتتىق پورتالى
