ەندى "كوك" مارتەبەسى بار قازاقستاندىقتار جۇمىس كۇندەرى ساۋدا ورتالىقتارىنا كىرە الماۋى مۇمكىن، دەپ حابارلايدى "ادىرنا" ۇلتتىق پورتالى.
– بۇگىنگى كۇنى باس سانيتارلىق دارىگەردىڭ قاۋلىسى بويىنشا "جاسىل" مارتەبەسى بار تۇلعالاردى عانا نىساندارعا كىرگىزۋ كوزدەلىپ وتىر. جاقىندا ۆاك وتىرىسىندا بۇل تاجىريبەنى جۇمىس كۇندەرى دە ساۋدا-ويىن ساۋىق ورتالىعىنىڭ جۇمىس تارتىبىنە ەنگىزۋ ۇسىنىلدى. ياعني، بۇگىنگى تاڭدا ساۋدا ويىن-ساۋىق ورتالىقتارىنا تەك "جاسىل" مارتەبەسى بار تۇلعالار عانا بارا الۋى ءۇشىن اتالعان ماسەلە تالقىلانۋدا، – دەدى الماتى قالاسى كاسىپكەرلەر پالاتاسى ديرەكتورىنىڭ ورىنباسارى سالتانات لەسباەۆا.
"قازاقپارات" حاا حابارلاماسىندا اتاپ وتىلگەندەي، "اتامەكەن" ۇكپ بۇل ماسەلەنى تالقىلاۋعا بەلسەندى قاتىسادى.
– سوو-دا كوپتەگەن كاسىپكەرلەر جۇمىس ىستەيدى. بۇل وبەكتىلەردە اينالىمى، تابىسى تومەندەۋى مۇمكىن باسقا دا قىزمەت تۇرلەرى ورنالاسقان. سوندىقتان بۇل ماسەلە قازىر بەلسەندى تالقىلانىپ جاتىر جانە پىسىقتالۋدا، – دەپ ناقتىلادى ول.
س. لەسباەۆا جاقىندا "اتامەكەن" ۇكپ باسقارما توراعاسىنىڭ ورىنباسارى ولجاس ورداباەۆتىڭ توراعالىعىمەن مۇددەلى بيزنەس سۋبەكتىلەرىن تارتا وتىرىپ، وسى ۇسىنىستى تالقىلاۋ بويىنشا جۇمىس كەڭەسى وتكەنىن اتاپ ءوتتى.
— ەندى بارلىق شىعىنداردى ەسەپتەۋ كەرەك، ولار ءوز جۇمىستارىن قالاي ۇيىمداستىرادى، بۇل كەلۋشىلەر ترافيگىنىڭ تومەندەۋىنە اسەر ەتە مە، جوق پا. وسى ماسەلەلەردىڭ بارلىعىن تالقىلاۋ قاجەت، سودان كەيىن دەنساۋلىق ساقتاۋ مينيسترلىگىندەگى ارىپتەستەرمەن بىرگە بۇل ماسەلە پىسىقتالاتىن بولادى، – دەپ قورىتىندىلادى لەسباەۆا.
"ادىرنا" ۇلتتىق پورتالى.
