بۇگىن بەلگرادتا (سەربيا) ءوتىپ جاتقان بوكستان XXI الەم چەمپيوناتىنىڭ جارتىلاي فينالىنا شىققان بىلعارى قولعاپ شەبەرلەرى انىقتالدى. بۇل قاتاردا قايرات ساتجانوۆ باستاعان ۇلتتىق قۇرامانىڭ بەس بوكسشىسى بار، دەپ حابارلايدى «ادىرنا» ءتىلشىسى مادەنيەت جانە سپورت مينيسترلىگىنە سىلتەمە جاساپ.
قازاقستاندىقتار اراسىنان العاش بولىپ شارشى الاڭعا شىققان تەمىرتاس ءجۇسىپوۆ (48 كگ دەيىن) وزبەكستاندىق نوديرجان ميرزااحمەتوۆتەن بولعان جەكپە-جەكتە سەنىمدى جەڭىسكە جەتتى. الەم چەمپيوناتىن 1/8 اينالىمنان باستاعان 2013 جىلى ازيا چەمپيونى ءبىرىنشى جەكپە-جەگىندە سەربيالىق ومەر امەتوۆيچتى جەڭگەن.
وسىدان كەيىن 54 كەلىگە دەيىنگى سالماقتا سىنعا ءتۇسىپ جاتقان ماحمۇد سابىرحان برازيليالىق ميشەل ترينيدادتان ءبىر باس جوعارى ەكەنىن كورسەتتى. 20 جاستاعى قازاقستاندىق بوكسشى الەم چەمپيوناتىنداعى العاشقى جەكپە-جەگىندە جاستار اراسىنداعى الەم چەمپيونى وڭتۇستىك كورەيالىق ين گيۋ كيمدى، سوسىن شوتلانديالىق مەتتيۋ ماكحەيلدى جەڭدى.
ال قازاقستان قۇراماسىنىڭ ءۇشىنشى وكىلى ءساماتالى تولتاەۆ (60 كگ دەيىن) ريو وليمپياداسىنىڭ كۇمىس جۇلدەگەرى، 2017 جىلعى الەم چەمپيونى فرانتسيالىق سوفيان ۋميادان ايلاسىن اسىرا المادى. ەستەرىڭىزگە سالا كەتەيىك، ءساماتالى سەربياداعى العاشقى كەزدەسۋىندە تايلاندتىق، كەلەسى كەزەڭدە كولۋمبيالىق دۋۆان زۋلەتانى قاپى قالدىرعان.
قازاقستان ەنشىسىنە جارتىلاي فينالدىڭ ءۇشىنشى جولداماسىن كاپيتان ابىلايحان ءجۇسىپوۆ الىپ كەلدى. ول موڭعوليالىق بااتۋرسۋحين چينزورينگپەن بولعان جەكپە-جەكتە بار بىلگەنىنەن جاڭىلعان جوق.
كۇندىزگى سەسسياداعى سوڭعى بىلعارى قولعاپ شەبەرىمىز نۇرقانات رايىس (75 كگ دەيىن) چەمپيوناتتى وسى جەردەن اياقتاۋعا ءماجبۇر. جەرلەسىمىزدىڭ جولىن يتاليالىق سالۆاتورە كاۆاللارو كەستى.
تۇنگى سەسسيادا شارشى الاڭعا شىققان تاعى بەس قازاقستاندىق بوكسشىنىڭ ەكەۋى عانا باسەكەنى ارى قاراي جالعاستىرادى. جازدا توكيو وليمپياداسىندا قولا مەدال العان ساكەن بيبوسىنوۆ تاجىريبەلى كولۋمبيالىق، ريوداعى وليمپيا ويىندارىنىڭ كۇمىس جۇلدەگەرى يۋبەرگەن مارتينەس ريۆاستان ايلاسىن اسىردى. ايتا كەتەيىك، وسىدان 2 جىل بۇرىن ەكاتەرينبۋرگتە (رەسەي) وتكەن بوكستان الەم چەمپيوناتىندا ەكى بوكسشى رينگتە كۇش سىناسىپ، ساكەننىڭ مەرەيى ۇستەم بولعان.
وسى ءبىر جەڭىستى سەريانى 57 كەلىگە دەيىنگى سالماقتاعى سەرىك تەمىرجانوۆ جالعاپ، جۇلدەگە ىلىككەن بەسىنشى بوكسشى اتاندى. پاۆلودارلىق سپورتشى رەسەيلىك ەدۋارد ساۆينگە ەش مۇمكىك قالدىرعان جوق.
وكىنىشكە قاراي، وسىدان كەيىن جۇدىرىقتاسقان قازاقستاندىق ءۇش شارشى الاڭ شەبەرى ۇتىلىپ قالدى. تارتىستى وتكەن جەكپە-جەكتەردە تورەشىلەر ءساناتالى تولتاەۆتى (63,5 كگ) شوتلانديالىق ريز لينچكە، اسلانبەك شىمبەرگەنوۆتى (71 كگ دەيىن) ۋكراينالىق يۋري زاحارەەۆكە، نۇربەك ورالبايدى سەربيالىق ۆلاديمير ميرونچيكوۆكە ەسە جىبەردى دەپ ەسەپتەدى.
«ادىرنا» ۇلتتىق پورتالى
