Qazaqstan quramasynyń bes boksshysy jartylaı fınalǵa joldama aldy

2207
Adyrna.kz Telegram

Búgin Belgradta (Serbııa) ótip jatqan bokstan XXI álem chempıonatynyń jartylaı fınalyna shyqqan bylǵary qolǵap sheberleri anyqtaldy. Bul qatarda Qaırat Satjanov bastaǵan ulttyq quramanyń bes boksshysy bar, dep habarlaıdy «Adyrna» tilshisi Mádenıet jáne sport mınıstrligine silteme jasap.

Qazaqstandyqtar arasynan alǵash bolyp sharshy alańǵa shyqqan Temirtas Júsipov (48 kg deıin) ózbekstandyq Nodırjan Mırzaahmetovten bolǵan jekpe-jekte senimdi jeńiske jetti. Álem chempıonatyn 1/8 aınalymnan bastaǵan 2013 jyly Azııa chempıony birinshi jekpe-jeginde serbııalyq Omer Ametovıchti jeńgen.

Osydan keıin 54 kelige deıingi salmaqta synǵa túsip jatqan Mahmud Sabyrhan brazılııalyq Mıshel Trınıdadtan bir bas joǵary ekenin kórsetti. 20 jastaǵy qazaqstandyq boksshy álem chempıonatyndaǵy alǵashqy jekpe-jeginde jastar arasyndaǵy álem chempıony ońtústik koreıalyq In Gıý Kımdi, sosyn shotlandııalyq Mettıý Makheıldi jeńdi.

Al Qazaqstan quramasynyń úshinshi ókili Samatáli Tóltaev (60 kg deıin) Rıo Olımpıadasynyń kúmis júldegeri, 2017 jylǵy álem chempıony franııalyq Sofıan Ýmıadan aılasyn asyra almady. Esterińizge sala keteıik, Samatáli Serbııadaǵy alǵashqy kezdesýinde taılandtyq, kelesi kezeńde kolýmbııalyq Dývan Zýletany qapy qaldyrǵan.

Qazaqstan enshisine jartylaı fınaldyń úshinshi joldamasyn kapıtan Abylaıhan Júsipov alyp keldi. Ol mońǵolııalyq Baatýrsýhıın Chınzorıngpen bolǵan jekpe-jekte bar bilgeninen jańylǵan joq.

Kúndizgi sessııadaǵy sońǵy bylǵary qolǵap sheberimiz Nurqanat Raıys (75 kg deıin) chempıonatty osy jerden aıaqtaýǵa májbúr. Jerlesimizdiń jolyn ıtalııalyq Salvatore Kavallaro kesti.

Túngi sessııada sharshy alańǵa shyqqan taǵy bes qazaqstandyq boksshynyń ekeýi ǵana básekeni ary qaraı jalǵastyrady. Jazda Tokıo Olımpıadasynda qola medal alǵan Sáken Bıbosynov tájirıbeli kolýmbııalyq, Rıodaǵy olımpııa oıyndarynyń kúmis júldegeri Iýbergen Martınes Rıvastan aılasyn asyrdy. Aıta keteıik, osydan 2 jyl buryn Ekaterınbýrgte (Reseı) ótken bokstan álem chempıonatynda eki boksshy rıngte kúsh synasyp, Sákenniń mereıi ústem bolǵan.

Osy bir jeńisti serııany 57 kelige deıingi salmaqtaǵy Serik Temirjanov jalǵap, júldege ilikken besinshi boksshy atandy. Pavlodarlyq sportshy reseılik Edýard Savınge esh múmkik qaldyrǵan joq.

Ókinishke qaraı, osydan keıin judyryqtasqan qazaqstandyq úsh sharshy alań sheberi utylyp qaldy. Tartysty ótken jekpe-jekterde tóreshiler Sanatáli Tóltaevti (63,5 kg) shotlandııalyq Rız Lınchke, Aslanbek Shymbergenovti (71 kg deıin) ýkraınalyq Iýrıı Zahareevke, Nurbek Oralbaıdy serbııalyq Vladımır Mıronchıkovke ese jiberdi dep eseptedi.

«Adyrna» ulttyq portaly

Pikirler