بەلگىلى جازۋشى، دراماتۋرگ، حالىقارالىق "الاش" ادەبي سىيلىعىنىڭ يەگەرى، بيىل مەرەيلى 80 جاسىن اتاپ وتكەن سوفى سماتاەۆ قاراعاندىلىق شەندىلەرگە وكپەسىن ايتىپ، جازبا قالدىردى دەپ حابارلايدى "ادىرنا" ۇلتتىق پورتالى.
جازۋشى فەيسبۋك جەلىسىندە ءوزىنىڭ جەرلەسى، قاراعاندىلىق قوعام بەلسەندىسى ايتقوجا فازىلعا "ارناپ" جازبا قالدىردى.
"ماۋسىمنىڭ باسىندا "وبلىس بولىپ قۇرىلعالى ورىس بيلەپ، ءجويت يلەگەن قاراعاندىدا قازاق رۋحىنىڭ ءيىسى دە قالمادى. سونىڭ ناتيجەسىندە وبلىسىمنىڭ تورەلەرىندە نيگيليستىك ۇعىم بارىنشا قالىپتاسقان. ولارعا قازاقتىڭ قايماعىن مازاق ەتۋ تۇك تە ەمەس تە، باسقا ۇلتتىڭ جايداعىن قۇرمەتتەۋ مارتەبە بوپ كورىنەدى...
دالەل مە... مەنىڭ 60, 70, 75 جىلدىق مەرەيتويلارىم نە اۋلىمدا، نە اۋدانىمدا، نە وبلىس ورتالىعىندا ءبىر دە ءبىر رەت وتكەن جوق. وسى بيىل 80 جىلدىعىمدى ۇيالعاندارىنان وتكىزەتىن شىعار دەپ وبلىس اكىمىنە دە، ورىنباسارىنا دا، اۋدانىمنىڭ اكىمىنە دە بىرنەشە رەت تەلەفون سوقسام دا، ءبىر دە بىرەۋى ترۋبكاسىن كوتەرىپ ء"اۋ! دەپ لەبىز تانىتقان جوق" دەگەنىمدى وقىپ، ايتقوجا فازىل باۋىرىم، ءسىز: "ۇلتىم دەپ ۇراندايتىن، ەلىم دەپ ەمىرەنەتىن ۇلكەن جۇرەگىڭىزدىڭ كەڭدىگىمەن كەسەكتىك تانىتىپ، وبلىس باسشىلارىنا ايقايلاپ اتوي سالعانسىز. سونىڭ ناتيجەسىندە ولاردىڭ مەنى "قۇشاق جايا قابىلداۋعا دايىن وتىر!" دەگەن حابارىڭىزعا قانىپ، پاراقشامدا سىزگە العىس ايتىپ، قۇرمەتىمدى بىلدىرگەنمىن. بىراق… وقىرماندارىمنىڭ: ء"سىز تەك قاراعاندىنىڭ عانا ەمەس، بۇكىل قازاقستاننىڭ سوفى سماتاەۆىسىز!" دەگەنىنە ازداپ لەپىرىپ جۇرسەم دە، وسى ورىس ءتىلدى، ورىس ءدىلدى قاراعاندىمنىڭ مەنى نەگە شەت قاقپايلاي بەرەتىنىن ۇعار ەمەسپىن", — دەگەن جازۋشى قاراعاندىنى باسقارىپ وتىرعان باسشىلاردىڭ نەمقۇرايلىلىق تانىتقانىنا وكپەسىن جەتكىزدى.
جازۋشىنىڭ ايتۋىنشا، وعان قاراعاندى وبلىسىنىڭ باسشىسى جەڭىس قاسىمبەك حابارلاسىپ، شىعارماشىلىق كەشىن قىركۇيەك ايىندا وتكىزۋگە ۋادە بەرگەن. الايدا وبلىس اكىمىنىڭ بۇل ۋادەسى ورىندالماپتى. ودان بەرگىدە وبلىس اكىمىنىڭ ورىنباسارى، وبلىستىق مادەنيەت باسقارماسىنىڭ باسشىسى جازۋشىعا شىعارماشىلىق كەشىنىڭ كەيىنگە قالعانىن جەتكىزگەن. ەندى "ۇيىمداستىرۋشىلار" كەشتى جەلتوقسان ايىنا قالدىرعانىن ايتىپتى. وسىلايشا قاراعاندىلىق شەندىلەر وزدەرىنىڭ ادەبيەتكە "جوق" ەكەندىكتەرىن، "قازاقتىڭ سوفىسى" اتانعان تۇلعانى سىيلاماي وتىرعاندارىن ءبىلدىرىپ قويدى.
بۇعان جازۋشى: "ايتقوجا باۋىر، "قۇشاقتارىن ايقارا اشىپ، ءسىزدى قۋانا توسىپ وتىر!" دەگەن وبلىس باسشىلارى "يت ءيتتى جۇمسايدى", "يت قۇيرىعىن جۇمسايدىنىڭ" كەبىن كەلتىرىپ، تۋعان قاراعاندىما اقىرى تابانىمدى تيگىزبەۋگە بەل بۋعان ءتارىزدى-اۋ", — دەپ اعىنان جارىلدى.
سونىمەن سوفى سماتاەۆتىڭ كەشى جەلتوقساندا وتە مە، جوق پا، ونى ۋاقىت كورسەتەدى. الايدا جەرلەستەرىنە رەنىش بىلدىرگەن جازۋشىنىڭ قازىرگى كوڭىل كۇيى الاي-دۇلەي. ال قاراعاندىلىق شەندىلەردەن ازىرگە "حابار" جوق.
قازىر فەيسبۋك جەلىسىندە جازۋشىنىڭ وقىرماندارى مەن سىيلاس ءىنى-قارىنداستارى جەڭىس قاسىمبەك باسقارىپ وتىرعان اكىمدىكتىڭ بۇل ء"ىسى" ادامگەرشىلىككە جاتپايتىنىن، ەكىنشى جاعىنان، بۇل ادەبيەتتى "مەنسىنبەۋ" ەكەنىن ايتىپ، ءوزارا پىكىرلەر قالدىرۋدا.
"ادىرنا" ۇلتتىق پورتالى.
