Belgili jazýshy, dramatýrg, halyqaralyq "Alash" ádebı syılyǵynyń ıegeri, bıyl mereıli 80 jasyn atap ótken Sofy Smataev qaraǵandylyq shendilerge ókpesin aıtyp, jazba qaldyrdy dep habarlaıdy "Adyrna" ulttyq portaly.
Jazýshy feısbýk jelisinde óziniń jerlesi, qaraǵandylyq qoǵam belsendisi Aıtqoja Fazylǵa "arnap" jazba qaldyrdy.
"Maýsymnyń basynda "Oblys bolyp qurylǵaly orys bılep, jóıt ılegen Qaraǵandyda qazaq rýhynyń ıisi de qalmady. Sonyń nátıjesinde oblysymnyń tórelerinde nıgılıstik uǵym barynsha qalyptasqan. Olarǵa qazaqtyń qaımaǵyn mazaq etý túk te emes te, basqa ulttyń jaıdaǵyn qurmetteý mártebe bop kórinedi...
Dálel me... Meniń 60, 70, 75 jyldyq mereıtoılarym ne aýlymda, ne aýdanymda, ne oblys ortalyǵynda bir de bir ret ótken joq. Osy bıyl 80 jyldyǵymdy uıalǵandarynan ótkizetin shyǵar dep oblys ákimine de, orynbasaryna da, aýdanymnyń ákimine de birneshe ret telefon soqsam da, bir de bireýi trýbkasyn kóterip "Áý! dep lebiz tanytqan joq" degenimdi oqyp, Aıtqoja Fazyl baýyrym, siz: "Ultym dep urandaıtyn, elim dep emirenetin úlken júregińizdiń keńdigimen kesektik tanytyp, oblys basshylaryna aıqaılap atoı salǵansyz. Sonyń nátıjesinde olardyń meni "qushaq jaıa qabyldaýǵa daıyn otyr!" degen habaryńyzǵa qanyp, paraqshamda sizge alǵys aıtyp, qurmetimdi bildirgenmin. Biraq… Oqyrmandarymnyń: "Siz tek Qaraǵandynyń ǵana emes, búkil Qazaqstannyń Sofy Smataevysyz!" degenine azdap lepirip júrsem de, osy orys tildi, orys dildi Qaraǵandymnyń meni nege shet qaqpaılaı beretinin uǵar emespin", — degen jazýshy Qaraǵandyny basqaryp otyrǵan basshylardyń nemquraılylyq tanytqanyna ókpesin jetkizdi.
Jazýshynyń aıtýynsha, oǵan Qaraǵandy oblysynyń basshysy Jeńis Qasymbek habarlasyp, shyǵarmashylyq keshin qyrkúıek aıynda ótkizýge ýáde bergen. Alaıda oblys ákiminiń bul ýádesi oryndalmapty. Odan bergide oblys ákiminiń orynbasary, oblystyq mádenıet basqarmasynyń basshysy jazýshyǵa shyǵarmashylyq keshiniń keıinge qalǵanyn jetkizgen. Endi "uıymdastyrýshylar" keshti jeltoqsan aıyna qaldyrǵanyn aıtypty. Osylaısha qaraǵandylyq shendiler ózderiniń ádebıetke "joq" ekendikterin, "qazaqtyń Sofysy" atanǵan tulǵany syılamaı otyrǵandaryn bildirip qoıdy.
Buǵan jazýshy: "Aıtqoja baýyr, "Qushaqtaryn aıqara ashyp, sizdi qýana tosyp otyr!" degen oblys basshylary "It ıtti jumsaıdy", "It quıryǵyn jumsaıdynyń" kebin keltirip, týǵan Qaraǵandyma aqyry tabanymdy tıgizbeýge bel býǵan tárizdi-aý", — dep aǵynan jaryldy.
Sonymen Sofy Smataevtyń keshi jeltoqsanda óte me, joq pa, ony ýaqyt kórsetedi. Alaıda jerlesterine renish bildirgen jazýshynyń qazirgi kóńil kúıi alaı-dúleı. Al qaraǵandylyq shendilerden ázirge "habar" joq.
Qazir feısbýk jelisinde jazýshynyń oqyrmandary men syılas ini-qaryndastary Jeńis Qasymbek basqaryp otyrǵan ákimdiktiń bul "isi" adamgershilikke jatpaıtynyn, ekinshi jaǵynan, bul ádebıetti "mensinbeý" ekenin aıtyp, ózara pikirler qaldyrýda.
"Adyrna" ulttyq portaly.
