بۇگىن، 29 قازان كۇنى حالىقارالىق تۇركى اكادەمياسىنىڭ جاڭا عيماراتىندا ايگىلى اكادەميك، قازاق انتروپولوگياسىنىڭ نەگىزىن قالاۋشى ورازاق سماعۇلوۆتىڭ ايناگۇل سماعۇلوۆامەن بىرلەسىپ جازعان «قازاق حالقى مەن ونىڭ اتا تەگىنە وراي انتروپولوگيالىق وچەركتەر» اتتى جاڭا ەڭبەگىنىڭ تانىستىرۋ ءراسىمى ءوتتى.
القالى جيىنعا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ، حالىقارالىق تۇركى اكادەمياسىنىڭ پرەزيدەنتى دارحان قىدىرالى، قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا، سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ، ازەربايجان، قىرعىزستان، وزبەكستان، تۇرىكمەنستان، تۇركيا ەلدەرىنىڭ قازاقستانداعى توتەنشە جانە وكىلەتتى ەلشىلەرى، قر ۇعا اكادەميگى ورازاق سماعۇلوۆ، مەملەكەت جانە قوعام قايراتكەرلەرى مىرزاتاي جولداسبەكوۆ، ءادىل احمەتوۆ، قۋانىش سۇلتانوۆ، بەلگىلى عالىم ايناگۇل سماعۇلوۆا، حالىقارالىق ۇيىم باسشىلارى، سونىمەن قاتار دەپۋتاتتار، ديپلوماتتار، جوعارعى وقۋ ورىندارى مەن زەرتتەۋ ورتالىقتارىنىڭ باسشىلارى، تانىمال تۇركولوگتار قاتىستى.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ العىسوزىمەن جارىق كورگەن ىرگەلى ەڭبەك تاۋەلسىزدىكتىڭ 30 جىلدىعىنا ارنالىپ وتىر. جاڭالىعى مول عىلىمي ەڭبەك ءتورت تىلدە – قازاق، تۇرىك، اعىلشىن جانە ورىس تىلدەرىندە ارقايسىسى جەكە-جەكە كىتاپ رەتىندە باسىلىپ شىقتى.
كەشەندى انتروپولوگيالىق زەرتتەۋ جۇمىستارىنىڭ قورىتىندىلارى نەگىزگە الىنعان بىرەگەي باسىلىمنىڭ لەنتاسىن مەملەكەتتىك حاتشى قىرىمبەك كوشەرباەۆ كەستى.
ىرگەلى ەڭبەكتە ابىز عالىم قازاق حالقىنىڭ ۇلى دالانى ەلۋ عاسىردان بەرى مەكەن ەتكەن اۆتوحتوندى جۇرت ەكەنىن بۇلجىماس عىلىمي ايعاقتارمەن دالەلدەپ بەردى. بىرەگەي باسىلىمعا ارقاۋ بولعان انتروپولوگيالىق زەرتتەۋلەردىڭ ناتيجەلەرى الەمگە تانىمال عالىمدار تاراپىنان جوعارى باعالانىپ وتىر.
جاڭا ەڭبەك تۋرالى پايىمدى پىكىرلەرىن بىلدىرگەن كوپتەگەن بەلگىلى عالىمداردىڭ ايتۋىنشا، الەمنىڭ ەشبىر ۇلتىندا تامىرىن 5000 جىلدىق تەرەڭنەن تارتاتىن تۇتاس تاريح عىلىمي ايقىندالماعان. سوندىقتان اتالعان تۋىندى الەۋمەتتىك-گۋمانيتارلىق عىلىمدار سالاسىنداعى ايتۋلى جاڭالىق سانالادى.
كىتاپ زەرتتەۋ ناتيجەلەرىن كورسەتەتىن قۇندى فوتودەرەك، جاڭعىرتپا سۋرەت، عىلىمي سىزبالارمەن بەزەندىرىلگەن.
حالىقارالىق تۇركى اكادەمياسىنىڭ
ءباسپاسوز قىزمەتى
