Búgin, 29 qazan kúni Halyqaralyq Túrki akademııasynyń jańa ǵımaratynda áıgili akademık, qazaq antropologııasynyń negizin qalaýshy Orazaq Smaǵulovtyń Aınagúl Smaǵulovamen birlesip jazǵan «Qazaq halqy men onyń ata tegine oraı antropologııalyq ocherkter» atty jańa eńbeginiń tanystyrý rásimi ótti.
Alqaly jıynǵa Qazaqstan Respýblıkasynyń Memlekettik hatshysy Qyrymbek Kósherbaev, Halyqaralyq Túrki akademııasynyń prezıdenti Darhan Qydyráli, Qazaqstan Respýblıkasynyń Mádenıet jáne sport mınıstri Aqtoty Raıymqulova, Syrtqy ister mınıstriniń birinshi orynbasary Shahrat Nuryshev, Ázerbaıjan, Qyrǵyzstan, Ózbekstan, Túrikmenstan, Túrkııa elderiniń Qazaqstandaǵy Tótenshe jáne Ókiletti Elshileri, QR UǴA akademıgi Orazaq Smaǵulov, memleket jáne qoǵam qaıratkerleri Myrzataı Joldasbekov, Ádil Ahmetov, Qýanysh Sultanov, belgili ǵalym Aınagúl Smaǵulova, halyqaralyq uıym basshylary, sonymen qatar depýtattar, dıplomattar, joǵarǵy oqý oryndary men zertteý ortalyqtarynyń basshylary, tanymal túrkologtar qatysty.
Qazaqstan Respýblıkasynyń Prezıdenti Qasym-Jomart Toqaevtyń alǵysózimen jaryq kórgen irgeli eńbek Táýelsizdiktiń 30 jyldyǵyna arnalyp otyr. Jańalyǵy mol ǵylymı eńbek tórt tilde – qazaq, túrik, aǵylshyn jáne orys tilderinde árqaısysy jeke-jeke kitap retinde basylyp shyqty.
Keshendi antropologııalyq zertteý jumystarynyń qorytyndylary negizge alynǵan biregeı basylymnyń lentasyn Memlekettik hatshy Qyrymbek Kósherbaev kesti.
Irgeli eńbekte abyz ǵalym qazaq halqynyń Uly Dalany elý ǵasyrdan beri meken etken avtohtondy jurt ekenin buljymas ǵylymı aıǵaqtarmen dáleldep berdi. Biregeı basylymǵa arqaý bolǵan antropologııalyq zertteýlerdiń nátıjeleri álemge tanymal ǵalymdar tarapynan joǵary baǵalanyp otyr.
Jańa eńbek týraly paıymdy pikirlerin bildirgen kóptegen belgili ǵalymdardyń aıtýynsha, álemniń eshbir ultynda tamyryn 5000 jyldyq tereńnen tartatyn tutas tarıh ǵylymı aıqyndalmaǵan. Sondyqtan atalǵan týyndy áleýmettik-gýmanıtarlyq ǵylymdar salasyndaǵy aıtýly jańalyq sanalady.
Kitap zertteý nátıjelerin kórsetetin qundy fotoderek, jańǵyrtpa sýret, ǵylymı syzbalarmen bezendirilgen.
Halyqaralyq Túrki akademııasynyń
Baspasóz qyzmeti
