تاۋەلسىزدىكتىڭ 30 جىلدىعى قارساڭىندا شىمكەنت قالاسىنىڭ وپەرا جانە بالەت تەاترى الەمگە ايگىلى «سەلسكايا چەست» وپەراسىن كورەرمەندەرگە تارتۋ ەتتى.
اتالعان وپەرانىڭ العاشقى پرەمەراسى 2017 جىلى شىمكەنت وپەرا جانە بالەت تەاترىندا ساحنالانعان بولاتىن. ونەر ۇجىمى قر تاۋەلسىزدىگىنىڭ 30 جىلدىعىنا وراي الەمدىك وپەرانى ونەرسۇيەر قاۋىمعا تارتۋ ەتىپ، كوپشىلىكتىڭ ىستىق ىقىلاسىنا بولەندى.
ۇزدىك تۋىندىنى ساحنالاۋعا الەمگە ايگىلى جانە ەلىمىزگە تانىمال ونەر مايتالماندارى جۇمىلدىرىلدى.
پ.ماسكانيدىڭ «سەلسكايا چەست» وپەراسىنىڭ پرەمەراسى العاش رەت 1890 جىلى ريم قالاسىندا «كوستانتسي» تەاترىندا ساحنالانعان بولاتىن. ءبىر اكتىلى وپەرا جەلىسى سيتسيليالىق اۋىلدا وتەدى.
دج.ۆەرگيدىڭ نوۆەللاسىنىڭ وقيعا جەلىسىمەن جازىلعان وپەرا پ.ماسكانيدىڭ الەمگە ايگىلى ەڭ ۇزدىك جانە تانىمال شىعارمالارىنىڭ ءبىرى.
وپەرا كەيىپكەرلەرى اراسىنداعى قارىم-قاتىناستار مەن شيەلەنىستەر اۋەزدى مۋزىكامەن كومكەرىلىپ، كورەرمەندەرگە وقيعانى اسەرلى ەتىپ جەتكىزەدى.
«سەلسكايا چەست» وپەراسىندا جاستاردىڭ ماحاببات جولىنداعى كۇرەسى، ساتقىندىق، تالاس-تارتىس، سودان ءوربيتىن شىتىرمان ەلىكتىرەر وقيعا، قاندى كەكپەن اياقتالاتىن سيۋجەتتە ادامدىق ەموتسيالار شەبەر سۋرەتتەلگەن.
باستى رولدە حالىقارالىق بايقاۋلاردىڭ لاۋرەاتى، ماسكەۋ قالاسىنان كەلگەن ەكاتەرينا گولوۆلەۆا – سانتۋتستسا ءرولىن سومداپ شىقتى. تۋرريدۋ رولىندە وپەرامىزدىڭ ءسوليستى، حالىقارالىق كونكۋرستاردىڭ لاۋرەاتى جۇمابەك قاڭتارباەۆ جانە وزبەكستان مەملەكەتى اليشەر ناۋاي تەاترىنان كەلگەن بەگزود سادىكوۆ وينادى.
قويىلىم رەجيسسەرى – قىرعىستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى نۇرلان اسانباەۆ، ديريجەر – تەمىرجان ەرجانوۆ.
رولدەردە قالالىق تەاتردىڭ سوليستەرى، حور، بالەت جانە سيمفونيالىق وركەستر ارتىستەرى ونەر كورسەتتى.
