شىمكەنتتە تاۋەلسىزدىكتىڭ 30 جىلىنا وراي قۇرىلىسى اياقتالعان تۇرعىن ۇيلەر پايدالانۋعا بەرىلە باستادى. «شاڭىراق» جەڭىلدەتىلگەن نەسيەلىك باعدارلاماسى بويىنشا ازاماتتاردى قونىستاندىرۋ جۇمىستارى جۇرگىزىلۋدە. بۇگىندە اتالعان باعىت بويىنشا تۇران شاعىناۋدانىندا ورنالاسقان العاشقى 5 تۇرعىن ءۇيدىڭ (№ 49ا، 50ا، 52ا، 53ا، 54ا) ينفراقۇرىلىمدىق كوممۋنالدىق قىزمەتتەرى ىسكە قوسىلىپ، پاتەر يەلەرىنە پاتەر كىلتتەرى تابىستالعان بولاتىن.
باعدارلاما بويىنشا باسپانالى بولعانداردىڭ قاتارىندا جادىرا ەرجىگىتوۆا دا بار. ءۇش بالانىڭ اناسى تولىق ەمەس وتباسى رەتىندە وسىدان 5 جىلداي ۋاقىت بۇرىن تۇرعىن ءۇي كەزەگىنە تىركەلگەن. بۇگىندە نەسيەلىك باسپاناعا قول جەتكىزگەن جالعىز باستى انانىڭ قۋانىشىندا شەك جوق. سەبەبى بۇرىن پاتەر جالداپ تۇرسا، ەندى ونىڭ ءوز شاڭىراعى بار.
– «شاڭىراق باعدارلاماسىنا قاتىسىپ، باسپانالى بولدىم. بۇرىن پاتەر جاعالاپ ءجۇرۋشى ەدىم، ەندى 3 بولمەلى ءۇيلى بولىپ جاتىرمىن. قازىر مەملەكەت تاراپىنان باسپاناعا مۇقتاج ازاماتتارعا بارىنشا قولداۋ كورسەتىلۋدە. اي سايىنعى پاتەراقىدان قۇتىلدىم. ەندى ءوز پاتەرىم ءۇشىن جۇمىس ىستەيمىن، – دەيدى قالا تۇرعىنى جادىرا ەرجىگىتوۆا.
ازاماتتاردى قونىستاندىرۋ جۇمىستارىن جۇرگىزۋ بارىسىندا شىمكەنت قالاسىنىڭ قۇرىلىس باسقارماسىنىڭ تۇرعىن ءۇي قۇرىلىسى ءبولىمىنىڭ باسشىسى شۋحراتجان مۋحتاروۆ جاڭا قونىس يەلەرىمەن كەزدەسىپ، تۇرعىن ۇيلەر بويىنشا ءتيىستى جۇمىستار جۇرگىزىلىپ جاتقاندىعىن ايتتى.
– «قازىرگى تاڭدا «شاڭىراق» باعدارلاماسىمەن سالىنعان 1728 پاتەر بويىنشا اباتتاندىرۋ، جىلۋ سىندى ينفراقۇرىلىمدىق ينجەنەرلىك كوممۋنالدىق جۇيەلەردى ىسكە قوسۋ جۇمىستارى جۇرگىزىلۋدە. اتالعان باعىت بويىنشا 2021 جىلدىڭ قاراشا ايىنىڭ باسىندا ينفراقۇرىلىمدىق كوممۋنالدىق قىزمەتتەرى قوسىلعان تاعى 7 تۇرعىن ۇيگە (6, 8 ، 10 ،12, 14, 16, 18) ازاماتتار قونىستاندىرىلاتىن بولادى. قالعان تۇرعىن ۇيلەر بويىنشا اباتتاندىرۋ جانە سىرتقى ينجەنەرلىك جۇيەلەردىڭ قوسىلۋ جۇمىستارى مەردىگەر مەكەمەلەر تاراپىنان جۇرگىزىلۋىنە بايلانىستى ازاماتتاردىڭ پاتەرلەرىنە قونىستانۋ مۇمكىنشىلىگى رەت رەتىمەن جۇزەگە اسىرۋ جوسپارلانعان. تۇرعىن ۇيلەرگە قاتىستى ورىن العان كەمشىلىكتەر نەمەسە قانداي دا ءبىر جاعدايلار تۋىنداعان جاعدايدا ءبىز ول ماسەلەلەردى مەردىگەر مەكەمەلەرمەن بىرگە شەشۋگە ءاردايىم دايىنبىز»، – دەدى شۋحراتجان مۋحتاروۆ.
ايتا كەتۋ كەرەك، «شاڭىراق 5-10-20» باعىتى بويىنشا جىل سوڭىنا دەيىن 1728 ازامات باسپانالى بولادى. باستاپقى جارنانىڭ ءبىر بولىگىن جابۋ ءۇشىن قايتارىمسىز نەگىزدە ءار ازاماتقا 1 ميلليون تەڭگەگە دەيىن بەرىلەتىن تۇرعىن ءۇي سەرتيفيكاتتارىنا جالپى 500,0 ملن تەڭگە قاراستىرىلعان.
