الماتى وبلىسى پەنجىم اۋىلىنداعى مەكتەپ اۋلاسىندا جاپپاي توبەلەس ورىن الدى، دەپ حابارلايدى “ادىرنا” ۇلتتىق پورتالى Stan.kz اقپارات اگەنتتىگىنە سىلتەمە جاساپ.
الەۋمەتتىك جەلىلەردە توبەلەس تۇسىرىلگەن سۋرەتتەر مەن ۆيدەو تارالۋدا. بەينەجازبادان جاسوسپىرىمدەردىڭ توبىن، قيراعان اۆتوكولىكتەر مەن عيماراتتىڭ سىنعان تەرەزەسىن اڭعارۋعا بولادى.
"27 قازان كۇنى پانفيلوۆ اۋداندىق ورتالىق اۋرۋحاناسى پەنجىم اۋىلىنداعى مەكتەپ اۋماعىنان 16 جاسار ءجاسوسپىرىم دەنە جاراقاتىمەن كەلىپ تۇسكەن. تەكسەرۋ بارىسىندا 9 جانە 10-سىنىپتا وقيتىن ەكى وقۋشىنىڭ اراسىندا اۋىزشا داۋ-داماي تۋىپ، ونىڭ سوڭى وقۋشىلار اراسىنداعى توبەلەسكە ۇلاسقانى جانە ونىڭ سالدارىنان ءجاسوسپىرىمنىڭ زارداپ شەككەنى بەلگىلى بولدى", – دەلىنگەن رەسمي حابارلامادا.
اتالعان فاكتى بويىنشا قر قك 106-بابىنىڭ 2-ءبولىمى (قاساقانا دەنساۋلىققا زيان كەلتىرۋ) نەگىزىندە قىلمىستىق ءىس تىركەلدى، جانجالعا قاتىسۋشىلاردىڭ بارلىعى انىقتالدى.
قازىرگى ۋاقىتتا زارداپ شەككەن ازاماتتىڭ جاعدايى تۇراقتى، وعان قاجەتتى مەديتسينالىق كومەك كورسەتىلدى.
اۋىل ازاماتتارى مەن اۋدان اكىمى، اقساقالدار جانە الماتى وبلىسى پد باستىعى تاراپىنان كەزدەسۋلەر مەن ءتۇسىندىرۋ جۇمىسى جۇرگىزىلدى. قازىرگى ۋاقىتتا جاعداي تۇراقتى جانە باقىلاۋدا.
“ادىرنا” ۇلتتىق پورتالى
