“باسى 8 جەردەن بالتالانعان”: ايەلىن ولتىرگەن قىلمىسكەردىڭ ءىسى قالاي اياقتالدى؟

5355
Adyrna.kz Telegram

بەلگىسىز جاعدايدا كوز جۇمعان قاراعاندىلىق  ايەلدىڭ تۋىستارى توقتاپ قالعان قىلمىستىق ءىستى قايتا قوزعاۋدى سۇرايدى. توعىزقۇدىق اۋىلىنىڭ تۇرعىنى وكتيابر ءبالبيدىڭ ءمايىتى بىلتىر  اۋىل سىرتىنان تابىلعان، دەپ حابارلايدى “ادىرنا” ۇلتتىق پورتالى استانا ارناسىنا سىلتەمە جاساپ.

ياعني، وكتيابردىڭ قايىن جۇرتى ءتىپتى بالالاردى دا ناعاشىلارىنا كورسەتپەيتىن كورىنەدى.  

8 اي بويى ىزدەۋدە بولعان توعىزقۇدىق اۋىلىنىڭ تۇرعىنى 35 جاستاعى وكتيابر ءبالبيدىڭ دەنەسى وتكەن ساۋىردە اۋىلدان 10 شاقىرىم جەردەن تابىلعان بولاتىن. كۇيەۋى سايات جامانباەۆ الدىمەن ايەلىن جوعالدى دەپ وتىرىك ايتىپ، 4 ايدان كەيىن بالتامەن شاۋىپ ولتىرگەنىن مويىنداعان. وسى ۋاقىتتا كامەلەتكە تولماعان 4 بالاسىن نوتاريۋس ارقىلى اپكەسىنىڭ اتىنا جازدىرىپ كەتكەن. ءسويتىپ پوليتسياعا بەرىلەتىن كۇنى قوراسىندا اسىلىپ قالادى. وسىلايشا "كۇدىكتى ءولدى" دەگەن سەبەپپەن ءىس جابىلعان.

“قىلمىستىق ءىس كۇدىكتىنىڭ ولىمىنە بايلانىستى توقتاتىلدى. سوتقا دەيىنگى تەرگەۋ بارىسىندا ءتيىستى شارالار جۇرگىزىلدى. وكتيابر ءبالبيدىڭ ولىمىنە تۋىستارىنىڭ قاتىسى بار ەكەنىن دالەلدەيتىن ايعاقتار راستالعان جوق”، – دەيدى قاراعاندى وبلىستىق پد باستىعى ەرلان فايزۋللين.

الايدا مارقۇمنىڭ اپكەسىنىڭ ايتۋىنشا ءسىڭلىسىنىڭ ولىمىنە قاتىسى بار قايىن جۇرتى بوستاندىقتا ءجۇر. ولار ايەلدىڭ دەنەسىن تەز ارادا جاسىرۋعا كومەكتەسكەن.

“جامانباەۆتىڭ تۋىستارىنا قاتىستى كوپتەگەن ادامدار تەرگەلمەي، بەتتەستىرۋگە كەلمەي قالدى. ءبىز پروكۋراتۋرادان ءىستى قايتا ساراپتاپ، ۋاقىتىن ۇزارتىپ بەرۋدى سۇرايمىز. مەنىڭ ءسىڭلىم بالبي وكتيابردى جامانباەۆ سايات جالعىز ءولتىردى دەگەنگە سەنبەيمىز. سەبەبى قىسقا ۋاقىتتىڭ ىشىندە ادامدى ءولتىرىپ بىرنەشە ساعاتتىڭ ىشىندە 12 شاقىرىم جەرگە اپارىپ كومىپ تاستادى. ءسىڭلىمنىڭ باسى 8 جەردەن بالتالانعان. سول ۋاقىتتا شاشىراعان قاندى كىم جۋدى؟ بۇعان كومەكتەسكەن ادام بار دەپ ەسەپتەيمىز”، – دەيدى مارقۇمنىڭ اپكەسى سايران بالبي.

وكتيابر ءبالبيدىڭ 4 كامەلەتكە تولماعان بالاسى قازىر اكەسىنىڭ اپكەسىندە. بالالاردى ەرىكتەرىنەن تىس نوتاريۋس ارقىلى  عانا يەمدەنىپ العان ايەل ولاردى ناعاشىلارىمەن كەزدەستىرمەيتىن كورىنەدى. مارقۇمنىڭ تۋىستارىنىڭ ايتۋىنشا،  بالالار تەپەرىشتە، تاياق جەپ ءجۇر. الايدا اۋداندىق  قامقورلىق ءبولىمى بۇل جاعدايعا ءمان بەرمەي وتىر دەيدى.

“بالبي وكتيابردىڭ ارتىندا كامەلەتكە تولماعان 4 بالاسى قالدى. وسى بالالاردى ىسكە قاتىسى بار دەگەن باياحمەتوۆا ۇستاپ وتىر. ءسىڭلىم قايتىس بولعانىن بىلمەي جاتىپ 10 كۇننىڭ ىشىندە قۇجاتتاندىرىپ العان.ناعاشىلارى بالالاردى كورۋگە بارعان كەزدە ءبىزدى سوتقا بەردى. سوت جانە بالا قامقورشىلىق ۇيىمىنان بالالاردى ناعاشىلارىمەن كەزدەسىپ تۇرۋعا مۇمكىندىك جاساپ شەشىم شىعارىپ بەرسە دەپ تالاپ ەتەمىز”، – دەيدى مارقۇمنىڭ اپكەسى.

وكتيابر ءبالبيدىڭ تۋىستارى جيەندەرى ءۇشىن قاتتى الاڭدايدى. اتا-اناسىز قالعان بۇلدىرشىندەرمەن ارالاسۋ مۇمكىن بولماعان سوڭ سوتقا شاعىمدانعان.  جاعدايعا قۇزىرلى قامقورلىق ورگاندارى ارالاسىپ، بالالارعا وتباسىن تاڭداۋ قۇقىن بەرۋدى سۇرايدى.

 “ادىرنا” ۇلتتىق پورتالى.

پىكىرلەر