Belgisiz jaǵdaıda kóz jumǵan qaraǵandylyq áıeldiń týystary toqtap qalǵan qylmystyq isti qaıta qozǵaýdy suraıdy. Toǵyzqudyq aýylynyń turǵyny Oktıabr Balbıdiń máıiti byltyr aýyl syrtynan tabylǵan, dep habarlaıdy “Adyrna” ulttyq portaly Astana arnasyna silteme jasap.
Iaǵnı, Oktıabrdiń qaıyn jurty tipti balalardy da naǵashylaryna kórsetpeıtin kórinedi.
8 aı boıy izdeýde bolǵan Toǵyzqudyq aýylynyń turǵyny 35 jastaǵy Oktıabr Balbıdiń denesi ótken sáýirde aýyldan 10 shaqyrym jerden tabylǵan bolatyn. Kúıeýi Saıat Jamanbaev aldymen áıelin joǵaldy dep ótirik aıtyp, 4 aıdan keıin baltamen shaýyp óltirgenin moıyndaǵan. Osy ýaqytta kámeletke tolmaǵan 4 balasyn notarıýs arqyly ápkesiniń atyna jazdyryp ketken. Sóıtip polıııaǵa beriletin kúni qorasynda asylyp qalady. Osylaısha "kúdikti óldi" degen sebeppen is jabylǵan.
“Qylmystyq is kúdiktiniń ólimine baılanysty toqtatyldy. Sotqa deıingi tergeý barysynda tıisti sharalar júrgizildi. Oktıabr Balbıdiń ólimine týystarynyń qatysy bar ekenin dáleldeıtin aıǵaqtar rastalǵan joq”, – deıdi Qaraǵandy oblystyq PD bastyǵy Erlan Faızýllın.
Alaıda marqumnyń ápkesiniń aıtýynsha sińlisiniń ólimine qatysy bar qaıyn jurty bostandyqta júr. Olar áıeldiń denesin tez arada jasyrýǵa kómektesken.
“Jamanbaevtyń týystaryna qatysty kóptegen adamdar tergelmeı, bettestirýge kelmeı qaldy. Biz prokýratýradan isti qaıta saraptap, ýaqytyn uzartyp berýdi suraımyz. Meniń sińlim Balbı Oktıabrdi Jamanbaev Saıat jalǵyz óltirdi degenge senbeımiz. Sebebi qysqa ýaqyttyń ishinde adamdy óltirip birneshe saǵattyń ishinde 12 shaqyrym jerge aparyp kómip tastady. Sińlimniń basy 8 jerden baltalanǵan. Sol ýaqytta shashyraǵan qandy kim jýdy? Buǵan kómektesken adam bar dep esepteımiz”, – deıdi marqumnyń ápkesi Saıran Balbı.
Oktıabr Balbıdiń 4 kámeletke tolmaǵan balasy qazir ákesiniń ápkesinde. Balalardy erikterinen tys notarıýs arqyly ǵana ıemdenip alǵan áıel olardy naǵashylarymen kezdestirmeıtin kórinedi. Marqumnyń týystarynyń aıtýynsha, balalar teperishte, taıaq jep júr. Alaıda aýdandyq qamqorlyq bólimi bul jaǵdaıǵa mán bermeı otyr deıdi.
“Balbı Oktıabrdiń artynda kámeletke tolmaǵan 4 balasy qaldy. Osy balalardy iske qatysy bar degen Baıahmetova ustap otyr. Sińlim qaıtys bolǵanyn bilmeı jatyp 10 kúnniń ishinde qujattandyryp alǵan.Naǵashylary balalardy kórýge barǵan kezde bizdi sotqa berdi. Sot jáne bala qamqorshylyq uıymynan balalardy naǵashylarymen kezdesip turýǵa múmkindik jasap sheshim shyǵaryp berse dep talap etemiz”, – deıdi marqumnyń ápkesi.
Oktıabr Balbıdiń týystary jıenderi úshin qatty alańdaıdy. Ata-anasyz qalǵan búldirshindermen aralasý múmkin bolmaǵan soń sotqa shaǵymdanǵan. Jaǵdaıǵa quzyrly qamqorlyq organdary aralasyp, balalarǵa otbasyn tańdaý quqyn berýdi suraıdy.
“Adyrna” ulttyq portaly.
