شەتەلدەگى 1 ميلليونعا جۋىق قانداس قازاقستانعا كوشىپ كەلۋگە نيەتتى. بۇل تۋرالى «وتانداستار قورى» كەاق ۆيتسە-پرەزيدەنتى ماعاۋيا سارباسوۆ مالىمدەدى، دەپ حابارلايدى “ادىرنا” ۇلتتىق پورتالى.
«قر اقپارات جانە قوعامدىق دامۋ مينيسترلىگىنىڭ تاپسىرماسىنا سايكەس ءبىز قانداستارعا ارنالعان «ەرۋلىك» اتتى جاڭا سايت اشتىق. سايت قازاق جانە ورىس تىلدەرىندە، لاتىن جانە توتە جازۋ نۇسقالارىندا اقپارات تاراتىپ جاتىر. مۇنداعى ماقسات – وتانعا كوشىپ كەلۋگە نيەتتى قانداستاردى اقپاراتپەن قامتۋ. وسى ورايدا، ەلىمىزدە سىرتتان كەلگەن قانداستار ءجيى ورنالاساتىن اقمولا، قوستاناي، پاۆلودار، سولتۇستىك قازاقستان جانە شىعىس قازاقستان وبلىستارىنىڭ الەۋمەتتىك-ەكونوميكالىق دامۋ كورسەتكىشى كوشىپ كەلۋدى جوسپارلاعان قانداستارعا اقپارات تۇرىندە ۇسىنىلىپ وتىر. ياعني قانداستار الدىن الا قايدا كەلەتىنىن، ول جەردەگى جول قانداي، مەكتەپ بار ما جانە تاعى باسقا ماڭىزدى جايتتارمەن الدىن الا تانىسا الادى»، – دەدى م. سارباسوۆ.
قور باسشىسى ميلليونعا جۋىق قانداسىمىز كوشىپ كەلۋگە نيەتتى ەكەنىن ايتتى.
«بۇگىندە قانداستارىمىزدىڭ اتالعان سايتقا كىرۋ، وقۋ ديناماكاسى ارتىپ كەلەدى. اسىرەسە قىتاي، رەسەي، يران، موڭعوليا، وزبەكستان، ۇلىبريتانيا مەن گەرمانياداعى قانداستارىمىزدىڭ ەرۋلىك سايتىنا ءجيى كىرەتىنى بايقالىپ وتىر. دەمەك اتالعان ەلدەردەگى قانداستارىمىز وتانىنا كەلۋگى قىزىعۋشىلىق تانىتادى دەگەن ءسوز. بىزدەگى ساراپتامالىق تالداۋعا سۇيەنسەك، بۇگىندە 1 ميلليونعا جۋىق قانداسىمىز ەلگە كوشىپ كەلۋگە نيەتتى. كاراتيندىك تالاپتار جەڭىلدەتىلىپ، شەكارالار اشىلسا كوش ۇلعايادى دەگەن ۇمىتتەمىز»، – دەيدى ول.
