Şeteldegı 1 millionǧa juyq qandas Qazaqstanǧa köşıp keluge niettı. Būl turaly «Otandastar qory» KEAQ vise-prezidentı Maǧauiia Sarbasov mälımdedı, dep habarlaidy “Adyrna” ūlttyq portaly.
Qor basşysy millionǧa juyq qandasymyz köşıp keluge niettı ekenın aitty.«QR Aqparat jäne qoǧamdyq damu ministrlıgınıŋ tapsyrmasyna säikes bız qandastarǧa arnalǧan «Erulık» atty jaŋa sait aştyq. Sait qazaq jäne orys tılderınde, latyn jäne töte jazu nūsqalarynda aqparat taratyp jatyr. Mūndaǧy maqsat – otanǧa köşıp keluge niettı qandastardy aqparatpen qamtu. Osy oraida, elımızde syrttan kelgen qandastar jiı ornalasatyn Aqmola, Qostanai, Pavlodar, Soltüstık Qazaqstan jäne Şyǧys Qazaqstan oblystarynyŋ äleumettık-ekonomikalyq damu körsetkışı köşıp keludı josparlaǧan qandastarǧa aqparat türınde ūsynylyp otyr. Iаǧni qandastar aldyn ala qaida keletının, ol jerdegı jol qandai, mektep bar ma jäne taǧy basqa maŋyzdy jaittarmen aldyn ala tanysa alady», – dedı M. Sarbasov.
«Bügınde qandastarymyzdyŋ atalǧan saitqa kıru, oqu dinamakasy artyp keledı. Äsırese Qytai, Resei, İran, Moŋǧoliia, Özbekstan, Ūlybritaniia men Germaniiadaǧy qandastarymyzdyŋ erulık saityna jiı kıretını baiqalyp otyr. Demek atalǧan elderdegı qandastarymyz otanyna kelugı qyzyǧuşylyq tanytady degen söz. Bızdegı saraptamalyq taldauǧa süiensek, bügınde 1 millionǧa juyq qandasymyz elge köşıp keluge niettı. Karatindık talaptar jeŋıldetılıp, şekaralar aşylsa köş ūlǧaiady degen ümıttemız», – deidı ol.
