Nur Otan سايلاۋالدى باعدارلاماسىنىڭ 24,8% ورىندالىپ ۇلگەردى

944
Adyrna.kz Telegram

ەلباسى، پارتيا ليدەرى نۇرسۇلتان نازارباەۆتىڭ توراعالىعىمەن وتەتىن ساياسي كەڭەستىڭ كەڭەيتىلگەن وتىرىسى قارساڭىندا ەلىمىزدىڭ بارلىق وڭىرلەرىندە ساياسي كەڭەستەر بيۋروسىندا فيليال باسشىلارى – اكىمدەردىڭ قاتىسۋىمەن «Nur Otan»-نىڭ 217 سايلاۋالدى باعدارلاماسىن جۇزەگە اسىرۋدىڭ ارالىق قورىتىندىلارى قارالدى.

پارتيانىڭ ءباسپاسوز قىزمەتىندە اتاپ وتكەندەي، مەملەكەت باسشىسى قاسىم-جومارت توقاەۆ جاريا ەتكەن «وزگەرىستەر جولى: ءار ازاماتقا لايىقتى ءومىر!» رەسپۋبليكالىق سايلاۋالدى باعدارلامانىڭ 24,8% ورىندالىپ ۇلگەردى. 9 ايدا وڭىرلەردە 10,4 ملن شارشى مەتر تۇرعىن ءۇي پايدالانۋعا بەرىلىپ، 165 مەكتەپ سالىندى، 259 مىڭنان استام تۇراقتى جۇمىس ورنى اشىلدى.

نۇر-سۇلتان قالاسىندا جىل باسىنان بەرى 115 كوشە جوندەلىپ، 4885 ءۇي گازبەن جابدىقتاۋ جۇيەسىنە قوسىلدى. الماتىدا 72 جەكە مەنشىك بالاباقشا اشىلىپ، 9 مەكتەپكە قوسىمشا كورپۋستاردىڭ قۇرىلىسى اياقتالدى. شىمكەنتتە 5 مەديتسينالىق مەكەمە مەن 115 سپورت الاڭى سالىندى.

اقمولا وبلىسىندا بيىل 48 ەت جانە 10 ءسۇت-تاۋار فەرماسى ىسكە قوسىلدى. اقتوبە وبلىسىندا پارتيانىڭ سايلاۋالدى باعدارلاماسى اياسىندا 488 مىڭ شارشى مەتر تۇرعىن ءۇي پايدالانۋعا بەرىلدى. الماتى وبلىسىندا 12 مەكتەپ جانە 135 بالاباقشا اشىلدى. اتىراۋ وبلىسىندا 6 مەكتەپتە ينكليۋزيانى قولداۋ كابينەتتەرى اشىلدى.

شىعىس قازاقستان وبلىسىنىڭ سەمەي قالاسىندا يادرولىق مەديتسينا ورتالىعى پايدالانۋعا بەرىلدى. ال وسكەمەندە وبلىستىق ونكولوگيا جانە حيرۋرگيا ورتالىعىنداعى وپەراتسيالىق بلوكتى جاڭعىرتۋ جۇمىستارى اياقتالدى.

جامبىل وبلىسىندا ەرەكشە قاجەتتىلىكتەرى بار ازاماتتار ءۇشىن كەدەرگىسىز ورتا قۇرۋ ماقساتىندا قالاداعى 255 نىسان تولىعىمەن بەيىمدەلدى. باتىس قازاقستان وبلىسىنداعى سىرىم اۋدانىنىڭ 6 اۋىلىندا سۋمەن جابدىقتاۋ نىساندارىنىڭ قۇرىلىسى اياقتالدى.

قوستاناي وبلىسىندا اۋىل شارۋاشىلىعى تەحنيكاسىن شىعاراتىن تسەح ءوز جۇمىسىن باستاسا، بۇدان بولەك مەديتسينالىق جابدىقتار مەن وڭالتۋدىڭ تەحنيكالىق قۇرالدارىن وندىرەتىن تسەح تا پايدالانۋعا بەرىلدى. قاراعاندى وبلىسىندا 1,4 مىڭ شاقىرىم جول جوندەلدى. قىزىلوردا وبلىسىندا 363 شاقىرىم گاز جەلىسى تارتىلىپ، وعان 38 مىڭ حالقى بار 3 ەلدى مەكەن قوسىلدى.

پاۆلودار وبلىسىنىڭ اگروونەركاسىپتىك كەشەنىندە جالپى سوماسى 4,7 ملرد.تەڭگە بولاتىن 8 جوبا ءساتتى ىسكە استى. ماڭعىستاۋ وبلىسىندا 28 مەكتەپ سالىندى جانە جوندەلدى.

سولتۇستىك قازاقستان وبلىسىندا سايلاۋالدى ۋادەلەردى ورىنداۋ اياسىندا 12 مىڭعا جۋىق تۇراقتى جاڭا جۇمىس ورنى اشىلدى. تۇركىستان وبلىسىندا جىل سوڭىنا دەيىن 717 ەلدى مەكەن ساپالى اۋىز سۋعا قول جەتكىزىپ، ءوڭىردىڭ تاعى 65 مىڭ تۇرعىنى تابيعي گازبەن قامتاماسىز ەتىلەدى.

ەسكە سالا كەتەيىك، ەلباسى، پارتيا ليدەرى نۇرسۇلتان نازارباەۆتىڭ تاپسىرماسى بويىنشا «Nur Otan» پارتياسىنىڭ سايلاۋالدى ۋادەلەرىن ىسكە اسىرۋدى جۇيەلى باقىلاۋدى قامتاماسىز ەتۋ ءۇشىن جاۋاپتى دەپۋتاتتار مەن باسشىلاردى ناقتى بەكىتە وتىرىپ، 217 جول كارتاسى ىسكە اسىرىلۋدا. 12 مىڭنان استام بەلسەندى ازاماتتىڭ قاتىسۋىمەن 1,7 مىڭنان استام قوعامدىق كەڭەستەن تۇراتىن وڭىرلىك جۇيە قۇرىلدى.

«ادىرنا» ۇلتتىق پورتالى

پىكىرلەر