كوكشەتاۋدا قالالىق كوپبەيىندى اۋرۋحاناسىنىڭ ۇجىمى ەمدەۋ مەكەمەسىنىڭ باس دارىگەرى ەرلان اياعانوۆتىڭ جۇمىستان بوساتىلۋىنا نارازىلىق ءبىلدىرىپ، شۋ كوتەردى دەپ حابارلايدى "ادىرنا" ۇلتتىق پورتالى "aikyn.kz" باسىلىمىنا سىلتەمە جاساپ.
مەكەمە دارىگەرلەرىنىڭ ايتۋىنشا، سوڭعى 2-2,5 اي ىشىندە اۋرۋحانادا تەكسەرىستەر تىم جيىلەپ كەتكەن. دەنساۋلىق ساقتاۋ باسقارماسىنىڭ باس دارىگەردى جۇمىستان شىعارۋعا بەرىلگەن بۇيرىعىنا قارسىلىق بىلدىرگەن 37 دارىگەر ءوز ەركىمەن جۇمىستان شىعۋعا ءوتىنىش بەرگەن.
اۋرۋحانا ۇجىمى دارىگەرلەرىنەن كەشەلى بەرى مازا كەتكەن. باسشىلارىنىڭ جۇمىستان شىعارىلۋىنا الاڭداعان دارىگەرلەر اقمولا وبلىسىنىڭ دەنساۋلىق ساقتاۋ باسقارماسىنان تۇسىنىكتەمە بەرۋىن تالاپ ەتكەن. بىراق باسقارما باسشىلىعى ۇجىمعا تۇسىندىرمەستەن باسشىنى جۇمىستان شىعارۋعا بۇيرىق بەرىپتى.
"كەشە شامامەن ەكىلەر شاماسىندا باس دارىگەرىمىز ەرلان اياعانوۆتى ەڭبەك كودەكسىنىڭ 52-بابىنىڭ 1-تارماعىنىڭ 10-تارماقشاسىنا سايكەس جۇمىستان بوساتۋ تۋرالى بۇيرىق ءتۇستى. جۇمىسىن ءتيىستى تۇردە ورىنداماعانى ءۇشىن دەلىنگەن. نەگىزى، دەنساۋلىق ساقتاۋ باسقارماسى اۋرۋحانا باسشىسىن جۇمىستان تايدىرۋ ءۇشىن ونىڭ سوڭىنان شام الىپ تۇسكەن سياقتى. ويتكەنى سوڭعى ەكى اي بويى بىرنەشە مارتە، ءتىپتى كۇنبە-كۇن تەكسەرىس بولىپ كەتتى. ولار ءبىر سىلتاۋ ىزدەۋگە كىرىستى. باسشىمىز وسى لاۋازىمعا كىرگەنىنە التى اي عانا وتسە دە ۇجىمدا ءتارتىپ ورناتىپ، جۇمىستى ءبىر ىزگە سالا ءبىلدى. بارلىعى وعان سەنىم ارتىپ، جۇمىسقا بەلسەندىلىك ارتتى. ءبىز ونى جۇمىستان بوساتپاۋدى تالاپ ەتىپ وتىرمىز", – دەيدى كوكشەتاۋ قالالىق اۋرۋحاناسىنىڭ دارىگەرى ناتاليا سينيتسكايا.
دارىگەرلەردىڭ ايتۋىنشا، باس دارىگەردىڭ باقىلاۋىنا قالالىق اۋرۋحانا ۇجىمىمەن قوسا ينفەكتسيالىق اۋرۋحانا دا قارايدى. ۇجىمعا رەسپۋبليكالىق بيۋدجەتتەن بولىنەتىن قىركۇيەك ايىندا بەرىلۋى ءتيىس ۇستەمەاقىلارى دا تۇسپەي قالعان. ال قازان ايىنا ءالى جالاقى تۇسپەگەن، سونداي-اق ۇستەمەاقىسىز قالۋ قاۋپى بار.
ء"بىز قازىر باس دارىگەر بولماعان سوڭ قۇجاتتارىمىزعا دا قول قويا الماي وتىرمىز. ۇجىمنىڭ ءبىراۋىزدان شەشىمىمەن 37 دارىگەر ءوز ەركىمەن جۇمىستان بوساتۋعا دەنساۋلىق ساقتاۋ باسقارماسىنا ارىز بەردى. قازىر ونى باسقارماعا بارىپ بەكىتەمىز. تاعى ءبىر تۇسىنىكسىز جاعداي، كەشە كەشكىسىن التىلار شاماسىندا باسقارمادان كەلگەن ادامدار باس دارىگەردەن جۇمىستان ءوز ەركىمەن بوساتۋ تۋرالى ارىز جازدىرىپ العان. ال وندا باس دارىگەر 25 قازان كۇنى جۇمىستان بوساتۋ تۋرالى ارىزدانعان. ياعني، ءۇش كۇن بۇرىن جۇمىستان بوساتىلعان ادام قايتا قالاي ارىز جازادى؟ بۇل جەردە ونى ارىز جازۋعا ماجبۇرلەپ قيناعانى انىق كورىنىپ تۇر", – دەپ تولىقتىردى ناتاليا ستانيسلاۆوۆنا.
ۇجىم دارىگەرلەرى اۋرۋحانادا دارىگەرلەر جۇمىستان كەتكەن جاعدايدا مەكەمە دارىگەرسىز قالاتىنىن ايتادى. ويتكەنى، قازىردىڭ وزىندە مەكەمەدە مەديتسينا قىزمەتكەرلەرىنىڭ تاپشىلىعى ايقىن سەزىلەدى. دارىگەرلەر 3 تاۋلىك بويى جۇمىس ىستەيتىن جاعدايلار ءجيى بولعان. ال مۇنداي جۇمىسقا باسشىلارىنا سەنگەندىكتەن تۇسكەندەرىن ايتادى.
ال وبلىستىق دەنساۋلىق ساقتاۋ باسقارماسى قازىرگى ۋاقىتتا باس دارىگەرگە قاتىستى سوتقا دەيىنگى تەرگەۋ جۇرگىزىلىپ جاتقانىن ايتتى.
"قازىر كوكشەتاۋ قالالىق كوپبەيىندى اۋرۋحانانىڭ لاۋازىمدى تۇلعالارىنا قاتىستى سوتقا دەيىنگى تەرگەۋ امالدارى ءجۇرىپ جاتىر. قىلمىستىق كودەكستىڭ 201-بابىنا جانە 407-بابىنا سايكەس سوتقا دەيىنگى تەرگەۋ مالىمەتتەرى جاريالاۋعا جاتپايدى. مەديتسينالىق ۇيىمنىڭ ءبىرىنشى باسشىسىمەن قازاقستان رەسپۋبليكاسى ەڭبەك كودەكسىنىڭ 56-بابىنىڭ 2-تارماعىنا سايكەس (جۇمىسشىنىڭ باستاماسىمەن ەكبەك كەلىسىمشارتىن بۇزۋ) ەڭبەك قاتىناسى 25 قازاننان باستاپ بۇزىلدى", – دەيدى اقمولا وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى.
"ادىرنا" ۇلتتىق پورتالى.
