Kókshetaýda qalalyq kópbeıindi aýrýhanasynyń ujymy emdeý mekemesiniń bas dárigeri Erlan Aıaǵanovtyń jumystan bosatylýyna narazylyq bildirip, shý kóterdi dep habarlaıdy "Adyrna" ulttyq portaly "aikyn.kz" basylymyna silteme jasap.
Mekeme dárigerleriniń aıtýynsha, sońǵy 2-2,5 aı ishinde aýrýhanada tekserister tym jıilep ketken. Densaýlyq saqtaý basqarmasynyń bas dárigerdi jumystan shyǵarýǵa berilgen buıryǵyna qarsylyq bildirgen 37 dáriger óz erkimen jumystan shyǵýǵa ótinish bergen.
Aýrýhana ujymy dárigerlerinen kesheli beri maza ketken. Basshylarynyń jumystan shyǵarylýyna alańdaǵan dárigerler Aqmola oblysynyń Densaýlyq saqtaý basqarmasynan túsinikteme berýin talap etken. Biraq basqarma basshylyǵy ujymǵa túsindirmesten basshyny jumystan shyǵarýǵa buıryq beripti.
"Keshe shamamen ekiler shamasynda bas dárigerimiz Erlan Aıaǵanovty Eńbek kodeksiniń 52-babynyń 1-tarmaǵynyń 10-tarmaqshasyna sáıkes jumystan bosatý týraly buıryq tústi. Jumysyn tıisti túrde oryndamaǵany úshin delingen. Negizi, Densaýlyq saqtaý basqarmasy aýrýhana basshysyn jumystan taıdyrý úshin onyń sońynan sham alyp túsken sııaqty. Óıtkeni sońǵy eki aı boıy birneshe márte, tipti kúnbe-kún tekseris bolyp ketti. Olar bir syltaý izdeýge kiristi. Basshymyz osy laýazymǵa kirgenine alty aı ǵana ótse de ujymda tártip ornatyp, jumysty bir izge sala bildi. Barlyǵy oǵan senim artyp, jumysqa belsendilik artty. Biz ony jumystan bosatpaýdy talap etip otyrmyz", – deıdi Kókshetaý qalalyq aýrýhanasynyń dárigeri Natalıa Sınıkaıa.
Dárigerlerdiń aıtýynsha, bas dárigerdiń baqylaýyna qalalyq aýrýhana ujymymen qosa ınfekııalyq aýrýhana da qaraıdy. Ujymǵa respýblıkalyq bıýdjetten bólinetin qyrkúıek aıynda berilýi tıis ústemeaqylary da túspeı qalǵan. Al qazan aıyna áli jalaqy túspegen, sondaı-aq ústemeaqysyz qalý qaýpi bar.
"Biz qazir bas dáriger bolmaǵan soń qujattarymyzǵa da qol qoıa almaı otyrmyz. Ujymnyń biraýyzdan sheshimimen 37 dáriger óz erkimen jumystan bosatýǵa Densaýlyq saqtaý basqarmasyna aryz berdi. Qazir ony basqarmaǵa baryp bekitemiz. Taǵy bir túsiniksiz jaǵdaı, keshe keshkisin altylar shamasynda basqarmadan kelgen adamdar bas dárigerden jumystan óz erkimen bosatý týraly aryz jazdyryp alǵan. Al onda bas dáriger 25 qazan kúni jumystan bosatý týraly aryzdanǵan. Iaǵnı, úsh kún buryn jumystan bosatylǵan adam qaıta qalaı aryz jazady? Bul jerde ony aryz jazýǵa májbúrlep qınaǵany anyq kórinip tur", – dep tolyqtyrdy Natalıa Stanıslavovna.
Ujym dárigerleri aýrýhanada dárigerler jumystan ketken jaǵdaıda mekeme dárigersiz qalatynyn aıtady. Óıtkeni, qazirdiń ózinde mekemede medıına qyzmetkerleriniń tapshylyǵy aıqyn seziledi. Dárigerler 3 táýlik boıy jumys isteıtin jaǵdaılar jıi bolǵan. Al mundaı jumysqa basshylaryna sengendikten túskenderin aıtady.
Al oblystyq densaýlyq saqtaý basqarmasy qazirgi ýaqytta bas dárigerge qatysty sotqa deıingi tergeý júrgizilip jatqanyn aıtty.
"Qazir Kókshetaý qalalyq kópbeıindi aýrýhananyń laýazymdy tulǵalaryna qatysty sotqa deıingi tergeý amaldary júrip jatyr. Qylmystyq kodekstiń 201-babyna jáne 407-babyna sáıkes sotqa deıingi tergeý málimetteri jarııalaýǵa jatpaıdy. Medıınalyq uıymnyń birinshi basshysymen Qazaqstan Respýblıkasy Eńbek kodeksiniń 56-babynyń 2-tarmaǵyna sáıkes (jumysshynyń bastamasymen ekbek kelisimshartyn buzý) eńbek qatynasy 25 qazannan bastap buzyldy", – deıdi Aqmola oblysy Densaýlyq saqtaý basqarmasynyń baspasóz qyzmeti.
"Adyrna" ulttyq portaly.
