ءتۇبى اۋىل حالقى كوتەرىلەدى. كوتەرىلگەندە ءجاي كوتەرىلمەيدى اشۋمەن شىعادى. جانە بۇنىڭ سوڭى ۇلكەن تراگەديامەن اياقتالادى. مەن بيلىكتى ۇركىتۋ ءۇشىن ەمەس ەسكەرتۋ ماقساتىندا جازىپ وتىرمىن. ايتپەسە اناۋ جوعارىداعىلار كۇندە تەلەۆيزوردان كورسەتىپ جاتسا دا ەستىمەگەن بىلمەگەن ادام سياقتى كەيىپتە ءجۇر.
نەگىزى بۇل پروبلەمادان ۇكىمەت، اۋىلشارۋاشىلىعى مينيسترلىگىندەگىلەر جاقسى حاباردار. بىلسە دە ۇندەمەيدى. اۋىلدىق جەرلەردەگى قاراپايىم حالىق جايىلىم جەرسىز قالىپ جاتقانىن ولار وتە جاقسى بىلەدى. زاڭ بويىنشا اۋىل ماڭىندا جەر جەتپەي قالعان جاعدايدا اكىمدىك بۇل جەرلەردى اۋىل حالقىنىڭ جايىلىمى ءۇشىن قايتارىپ الۋعا تولىق قۇقىلى. بىراق اكىمدەر اۋىلداعى باي باعلانداردارمەن اۋىز جالاسقان سوڭ ولارعا قارسى شىعا المايدى. تۇرعىندارعا جەردى قايتارىپ بەرە الماي وتىر.
قازىرگى اۋىلداعى جاعداي تۋرا ءبىر پاتشا ۇكىمەتىنىڭ كەزىندەگىدەي. باي مەن كەدەيدىڭ اراسى جەر مەن كوكتەي. بايلار العان جەرلەرىن سوعىستاعى وكوپتاعىداي قورشاپ تاستاعان. بۇعان زاڭ بويىنشا تيىم سالىنسا دا جەرگىلىكتى قۇزىرلى ورگاندار تاعى دا ۇندەي المايدى. كەسىرەنەن حالىقتىڭ مالى سول قورشاۋعا قۇلاپ قىرىلىپ جاتىر. جەردى قورشاعانداردى جۇرت فاشيستەردەن دە ارمەن جەك كورەدى. اقىرى اشىنعان حالىق قازىر تىستەنىپ ازەر ءجۇر. قاندارى بۇرق-سارق قايناپ جاتىر. ەندى سول اشۋ ءبىر كۇنى توگىلەدى. سوڭى جامان بولادى. سونىڭ الدىن العىسى كەلەتىندەر بولسا شۇعىل كوميسسيا قۇرىپ اۋىلدىق جەرلەردەگى حالىقتىڭ جايىلىمدارىن جۇرتقا جەدەل قايتارىڭدار. بۇل ماسەلە كەلەر كوكتەمدە تاعى كوتەرىلەدى. بىراق كەش بولادى.
"ادىرنا" ۇلتتىق پورتالى
