Túbi aýyl halqy kóteriledi. Kóterilgende jáı kóterilmeıdi ashýmen shyǵady. Jáne bunyń sońy úlken tragedııamen aıaqtalady. Men bılikti úrkitý úshin emes eskertý maqsatynda jazyp otyrmyn. Áıtpese anaý joǵarydaǵylar kúnde televızordan kórsetip jatsa da estimegen bilmegen adam sııaqty keıipte júr.
Negizi bul problemadan úkimet, aýylsharýashylyǵy mınıstrligindegiler jaqsy habardar. Bilse de úndemeıdi. Aýyldyq jerlerdegi qarapaıym halyq jaıylym jersiz qalyp jatqanyn olar óte jaqsy biledi. Zań boıynsha aýyl mańynda jer jetpeı qalǵan jaǵdaıda ákimdik bul jerlerdi aýyl halqynyń jaıylymy úshin qaıtaryp alýǵa tolyq quqyly. Biraq ákimder aýyldaǵy baı baǵlandardarmen aýyz jalasqan soń olarǵa qarsy shyǵa almaıdy. Turǵyndarǵa jerdi qaıtaryp bere almaı otyr.
Qazirgi aýyldaǵy jaǵdaı týra bir patsha úkimetiniń kezindegideı. Baı men kedeıdiń arasy jer men kókteı. Baılar alǵan jerlerin soǵystaǵy okoptaǵydaı qorshap tastaǵan. Buǵan zań boıynsha tıym salynsa da jergilikti quzyrly organdar taǵy da úndeı almaıdy. Kesirenen halyqtyń maly sol qorshaýǵa qulap qyrylyp jatyr. Jerdi qorshaǵandardy jurt fashısterden de ármen jek kóredi. Aqyry ashynǵan halyq qazir tistenip ázer júr. Qandary burq-sarq qaınap jatyr. Endi sol ashý bir kúni tógiledi. Sońy jaman bolady. Sonyń aldyn alǵysy keletinder bolsa shuǵyl komıssııa quryp aýyldyq jerlerdegi halyqtyń jaıylymdaryn jurtqa jedel qaıtaryńdar. Bul másele keler kóktemde taǵy kóteriledi. Biraq kesh bolady.
"Adyrna" ulttyq portaly
