تۇركيا پرەزيدەنتى رەجەپ تايىپ ەردوعان ەلدىڭ سىرتقى ىستەر مينيسترىنە 10 مەملەكەتتىڭ ەلشىسىن "پەرسونا نون گراتا" دەپ جاريالاۋدى تاپسىردى دەپ حابارلايدى "ادىرنا" ۇلتتىق پورتالى.
Daily Sabah باسىلىمىنىڭ جازۋىنشا، تۇركيادان مىنا ەلدەردىڭ ەلشىلەرى شىعارىلماق: اقش، كانادا، فرانتسيا، فينليانديا، دانيا، گەرمانيا، نيدەرلاندى، جاڭا زەلاندي، نورۆەگيا، شۆەتسيا.
"مەن ءبىزدىڭ ەلدىڭ سىرتقى ىستەر مينيسترىنە دەرەۋ شارا قولدانۋ كەرەكتىگىن ايتتىم. ياعني اتالمىش 10 ەلشىنى "پەرسونا نون گراتا" دەپ جاريالاۋدى تاپسىردىم", - دەدى تۇركيا پرەزيدەنتى ەسكيشەحير قالاسىندا سويلەگەن سوزىندە.
باسىلىمنىڭ مالىمەتىنشە، ەردوعاننىڭ مۇنداي شەشىم قابىلداۋىنا 18 قازان كۇنى ديپلوماتتاردىڭ قۇقىق قورعاۋشى وسمان كاۆالدى بوساتۋ جايلى مالىمدەمەسى سەبەپ بولعان. وسىدان كەيىن بارلىق ەلشىلەر تۇركيانىڭ سىرتقى ىستەر مينيسترلىگىنە شاقىرىلىپ، ولارعا كونسۋلدىق قاتىناستار تۋرالى ۆەنا كونۆەنتسياسىن ساقتاۋ قاجەتتىگى ەسكەرتىلگەن.
ايتا كەتەيىك، وسمان كاۆال قۇقىق قورعاۋشى ءارى ەتنيكالىق جانە ءدىني ازشىلىق توپتارىن قولدايتىن Anadolu Kültür AŞ مادەني قورىنىڭ نەگىزىن سالۋشى. ول 2013 جىلى ستامبۋلدىڭ گەزي ساياباعىنداعى نارازىلىق شەرۋىنە (ۇكىمەتتى بيلىكتەن كەتىرۋگە تالپىنۋ ارەكەتى-رەد.) قاتىستى ءىس بويىنشا ايىپتالىپ، 2020 جىلدىڭ اقپان ايىندا اقتالىپ شىققان ەدى.
الايدا ستامبۋل پروكۋراتۋراسى سول كۇنى ونى قايتا قاماۋعا الۋعا وردەر بەرگەن. بۇل جولى وسمان كاۆال 2016 جىلى ەلدە مەملەكەتتىك توڭكەرىس جاساۋعا قاتىستى دەپ ايىپتالعان. سودان بەرى ول قاماۋدا وتىر.
"ادىرنا" ۇلتتىق پورتالى.
