بيىل اتوم يادرولىق جارىلىسىنا قارسى "نەۆادا-سەمەي" حالىقارالىق قوزعالىسىنىڭ قۇرىلعانىنا 32 جىل تولىپ وتىر. وسىعان وراي سەمەي قالاسىنداعى اباي اتىنداعى ورتالىق كىتاپحانادا "سەمەي يادرولىق سىناق پوليگونى تۋرالى زاڭدى ىسكە اسىرۋدىڭ پروبلەمالارى مەن پەرسپەكتيۆالارى" اتتى حالىقارالىق كونفەرەنتسيا ءوتتى. وعان ەلىمىزدىڭ بارلىق وڭىرىنەن جانە ونلاين رەجيمدە كورشىلەس مەملەكەتتەردەن بەلگىلى تۇلعالار مەن قوزعالىس وكىلدەرى، اقىن-جازۋشىلار مەن ارداگەرلەر قاتىستى. شاراعا اقتوبەلىكتەر دە ۇلەس قوستى دەپ حابارلايدى "ادىرنا" ۇلتتىق پورتالىنىڭ ءتىلشىسى.
شارانى ونلاين رەجيمدە قوعام قايراتكەرى، "نەۆادا-سەمەي" قوزعالىسىنىڭ كوشباسشىسى ولجاس سۇلەيمەنوۆ اشىپ، 1989 جىلعى 19 قازاندا حالىقارالىق انتيادرولىق "نەۆادا-سەمەي" قوزعالىسى سەمەي پوليگونىندا جوسپارلانعان 18 يادرولىق جارىلىستىڭ 11-ءىن توقتاتقانىن، كسرو اسكەري-ونەركاسىپتىك كەشەنى قۋاتتى دا ايبىندى كۇشكە يە بولىپ وتىرعان سول ۋاقىتتا بۇل قاھارماندىق ءىس بولعانىن جەتكىزدى.
ايتا كەتۋ كەرەك، 1989 جىلدىڭ 19 قازانىندا تاسس سەمەي پوليگونىندا قۋاتتىلىعى 150 كيلوتوننانى قۇراعان كەزەكتى جەراستى جارىلىسى تۋرالى حابارلاعان كەزدە وسىناۋ ىزگىلىكتى ميسسيانى ورىنداۋ ءۇشىن ولجاس سۇلەيمەنوۆ حالىقتىڭ قالىڭ بۇقاراسى مەن پارلامەنتتىك ديپلوماتيانى كەڭىنەن تارتۋ ءۇشىن زور كۇش-جىگەر جۇمسادى. قوزعالىس الماتىدا، سەمەيدە، ساراندا، قاراۋىلدا، ماسكەۋدە نارازىلىق ميتينگىلەرىن ۇيىمداستىردى. قاراعاندى مەن پاۆلودارداعى ميتينگىلەردە كسرو جوعارى كەڭەسىنە ۇندەۋ قابىلدانىپ، سەمەي يادرولىق پوليگونىن جابۋ تۋرالى ماسەلەنى شۇعىل ەنگىزۋ تالاپ ەتىلدى.
كونفەرەنتسيا بارىسىندا بايانداما جاساعان "نەۆادا-سەمەي" حالىقارالىق انتيادرولىق قوزعالىسىنىڭ مۇشەسى گۇلدانا نۇرپەيىسوۆا قوزعالىس وكىلدەرى ەلىمىزدىڭ ءار وڭىرىندە قانداي جۇمىستار اتقارىلىپ جاتقاندىعىن ايتىپ، اقتوبە مەن اتىراۋ وبلىستارىنىڭ جاساپ جاتقان باستامالارىن وزگەلەرگە ۇلگى ەتتى. سونداي-اق ول بيىل كۇزدە حالىقارالىق قوزعالىستىڭ قۇرىلعانىنا 32 جىل تولۋىنا وراي الدا تاعى بىرقاتار شارالار وتەتىنىن ايتتى.
جيىندا سەمەيلىكتەر مەملەكەت تاراپىنان بەرىلەتىن جەڭىلدىكتەر ماسەلەسىنە توقتالىپ، زاڭعا سايكەس الداعى ۋاقىتتا بۇل باعىتتاعى پروبلەمالاردىڭ شەشىلۋىن سۇرادى.
كونفەرەنتسيا سوڭىندا قالا باسشىلىعى قاتىسۋشىلارعا ريزاشىلىعىن جەتكىزىپ، ەستەلىككە كىتاپتار تارتۋ ەتتى.
— قازاقستان — يادرولىق قارۋدان ءوز ەركىمەن باس تارتقان العاشقى ەل. سونداي-اق قاراپايىم حالىق، بيلىك پەن ساياساتكەرلەردىڭ ىزگى نيەتىن بىرىكتىرۋگە بولاتىنىن الەمگە دالەلدەگەن مەملەكەت. قازاقستان ءوزىنىڭ باستاماسىن ەڭ جوعارى تريبۋنالاردا ءبىرىنشى بولىپ جەتكىزدى. بۇل ۇلكەن قادام بولدى. بۇگىنگى شارادا ءبىز وسى جونىندە ءوز پىكىرىمىزدى ايتىپ، بولاشاق ۇرپاقتىڭ جادىندا قالاتىنداي باستامالاردى جۇزەگە اسىرۋعا ءتيىس ەكەنىمىزدى تۇسىندىك، — دەيدى اقتوبەلىك بەلسەندى جاس دەپۋتات ازامات ۋسيمبەكوۆ.
"ادىرنا" ۇلتتىق پورتالى.
