2023 جىلدىڭ 3 ناۋرىزىندا «اق جول» دەمپارتياسى 8 جىل بويى تالاپ ەتىپ كەلگەن «جەكە تۇلعالاردىڭ بانكروتتىعى تۋرالى» زاڭ كۇشىنە ەندى. بۇل تۋرالى الماتىداعى جاقتاستار ميتينگىسىندە پارتيا توراعاسى ازات پەرۋاشەۆ مالىمدەدى، دەپ حابارلايدى “ادىرنا” ۇلتتىق پورتالى.
ازات پەرۋاشەۆ بۇل تاقىرىپتىڭ تاريحىنا دا توقتالىپ ءوتتى.
«اق جول» فراكتسياسى «جەكە تۇلعالاردىڭ بانكروتتىعى تۋرالى» زاڭدى ازىرلەۋدى العاش رەت 2014 جىلى ۇسىنعان بولاتىن. بۇل باستاماعا 2008-2011 جىلدارداعى ەكونوميكالىق داعدارىس سالدارىنان كوپتەگەن كاسىپورىنداردىڭ كۇيرەۋى جانە توقتاپ قالۋ فاكتىلەرى، سونداي-اق ازاماتتاردىڭ تولەم قابىلەتسىزدىگى مەن كوللەكتورلاردىڭ زاڭسىزدىعى سەبەپ بولدى.
حالىقارالىق تاجىريبەنى زەرتتەگەن «اق جول» دەمپارتياسى بورىشكەرلەردىڭ الەۋمەتتىك قۇقىقتارىن قورعاۋ بويىنشا ۇسىنىستار دايىندادى، ول ءۇش نەگىزگى شارانى قامتۋشى ەدى: قارىز بويىنشا پايىز ەسەپتەۋدى توقتاتۋ، قارىزدىڭ بەلگىلەنگەن سوماسىن وتەۋگە قوسىمشا مەرزىم بەرۋ جانە قارىزدى وتەۋ ءۇشىن بورىشكەردىڭ جالعىز باسپاناسىن الىپ قويۋعا تىيىم سالۋ.
الايدا قارجى مينيسترلىگى بۇل ۇسىنىستارعا توسقاۋىل قويىپ، «مۇنداي تەتىك ەلىمىزدە 2016-2017 جىلدارعا جوسپارلانعان كىرىستەردى جالپىعا بىردەي دەكلاراتسيالاۋدى ەنگىزۋ ارقىلى عانا مۇمكىن بولادى» دەپ جاۋاپ بەرگەن. «اق جول» دەمپارتياسىنىڭ سول ۇسىنىسىنان جىل سايىن ءتۇرلى سىلتاۋلارمەن باس تارتىلىپ كەلدى.
2017 جانە 2019 جىلدارى ۇكىمەتتىڭ ءتيىستى جاۋابىن كۇتپەستەن، «اق جول» دەمپارتياسى «جەكە تۇلعالاردىڭ بانكروتتىعى تۋرالى» زاڭ جوبالارىن ازىرلەپ، ۇسىندى، وعان دا مەملەكەتتىك ورگاندار توسقاۋىل قويدى.
الماتىدا بورىشكەر ءوزىن ۇيدەن شىعارۋعا كەلگەن بەس ادامدى اتىپ تاستاعان نەمەسە اناسى بالالارىن كوپقاباتتى ۇيدەن لاقتىرىپ جىبەرگەن بىرقاتار قايعىلى وقيعالاردان كەيىن عانا ماسەلەنىڭ وزەكتىلىگى مەن وتكىرلىگىنە ۇكىمەتتىڭ كوزى جەتتى، ونىڭ وزىندە پرەزيدەنت ق.توقاەۆتىڭ 2021 جىلعى جەلتوقسانداعى تىكەلەي تاپسىرماسىنان كەيىن عانا.
2022 جىلى ۇكىمەت پەن ۇلتتىق بانك «اق جول» پارتياسىنىڭ ۇسىنىستارىن ەسكەرە وتىرىپ زاڭ جوباسىن دايىندادى، ول بويىنشا پارلامەنتتەگى جۇمىستى دەمپارتيا دەپۋتاتى دانيا ەسپاەۆا باسقاردى.
2022 جىلعى 30 جەلتوقساندا پرەزيدەنت ق.توقاەۆ جەكە تۇلعالاردىڭ تولەم قابىلەتتىلىگىن جانە بانكروتتىعىن قالپىنا كەلتىرۋ تۋرالى زاڭعا قول قويدى.
بۇل زاڭنىڭ قابىلدانۋى قازاقستان رەسپۋبليكاسىنىڭ پرەزيدەنتى ق.توقاەۆتىڭ تىكەلەي تاپسىرماسىن ورىنداۋدىڭ جانە «اق جول» دەموكراتيالىق پارتياسى جانە ۇكىمەت پەن ۇلتتىق بانك اراسىنداعى 8 جىلعا سوزىلعان داۋلاردىڭ ناتيجەسىندە بولدى.
«اق جول» فراكتسياسى تالاپ ەتسە دە، قۇجاتتا بورىشكەرلەردىڭ جالعىز باسپاناسىن الىپ قويۋعا تىيىم سالۋ ماسەلەسى تولىق شەشىلمەگەن، بىراق، سونىڭ وزىندە بۇل زاڭ ازاماتتاردىڭ قارىز اۋىرتپالىعىن جەڭىلدەتىپ، قيىن ومىرلىك جاعدايعا تاپ بولعان مىڭداعان ازاماتتارعا ناقتى كومەك كورسەتەتىن ماڭىزدى قۇرالعا اينالارى ءسوزسىز.
العاشقى كۇننىڭ وزىندە-اق 2,5 مىڭ قازاقستاندىقتىڭ وسى زاڭدى قولدانۋعا ءوتىنىش بىلدىرگەنى كەزدەيسوق ەمەس.
ۇكىمەت پەن ۇلتتىق بانك «اق جول» دەپۋتاتتارىنىڭ تالابىن ەلەمەي كەلگەن 8 جىل ىشىندە قانشا مىڭ قانداستارىمىزدىڭ بارىنان ايىرىلىپ قالعانىن بولجاۋ عانا قالدى، - دەدى ا.پەرۋاشەۆ ميتينگىدە.
