"اق جول" دەموكراتيالىق پارتياسىنىڭ فراكتسياسى ۇلتتىق قور قارجىسىنا زيان كەلتىرگەندەردىڭ قولدارىن شابۋدى ۇسىندى. بۇل تۋرالى ءماجىلىس دەپۋتاتى ازات پەرۋاشەۆ ءماجىلىستىڭ رەسپۋبليكالىق بيۋدجەتتى تالقىلاعان كەشەگى وتىرىسىندا مالىمدەدى دەپ حابارلايدى "ادىرنا" ۇلتتىق پورتالى.
"اق جول" دەموكراتيالىق پارتياسى ون جىلدان بەرى ۇلتتىق قور قاراجاتىمەن تىم ەركىن قارىم-قاتىناستى شەكتەۋگە شاقىرادى. اعىمداعى جىلدىڭ ءبىرىنشى جارتىجىلدىعىندا ۇلتتىق قورعا تۇسەتىن تۇسىمدەر 2020 جىلمەن سالىستىرعاندا 3 ەسەگە قىسقاردى، دەگەنمەن بيىل مۇناي باعاسى كوپتەگەن جىلدارمەن سالىستىرمالى تۇردە رەكوردتىق كورسەتكىشكە جەتتى", - دەدى "اق جول" قدپ فراكتسياسىنىڭ جەتەكشىسى.
ول ەسەپ كوميتەتىنىڭ اقپاراتى بويىنشا، اعىمداعى جىلدىڭ ءبىرىنشى جارتىجىلدىعىندا ۇلتتىق قوردىڭ شىعىستارى تۇسىمدەردەن دە اسىپ كەتكەنىن اتاپ ءوتتى.
ء"بىز وزگەلەردىڭ - ءالى تۋىلماعان قازاقستاندىقتاردىڭ اقشاسىن جەپ جاتىرمىز. سونىمەن قاتار، 2022 جىلى ۇلتتىق قوردىڭ جيناقتارى ءجىو-ءنىڭ 30 %-ىندا تومەندەمەيتىن قالدىققا جاقىندايدى، ال 2023-24 جىلدارى ولار وسى شەكتەن دە شىعادى دەپ كۇتىلۋدە", - دەپ تولىقتىردى ا. پەرۋاشەۆ.
ونىڭ ايتۋىنشا، ۇسىنىلعان ءۇش جىلدىق بيۋدجەتتە ۇلتتىق قوردان بەرىلەتىن ترانسفەرتتەر سوماسىن كەزەڭ-كەزەڭىمەن تومەندەتۋ قاراستىرىلعان. الايدا، بيۋدجەتتىڭ جىل سايىنعى ناقتىلانۋى كەزىندە بۇل سوما ەكى ەسەگە دەرلىك ۇلعايادى (ماسەلەن، 2021 جىلعا نىسانالى ترانسفەرت مولشەرى 850 ملرد. تەڭگەگە ۇلعايتىلدى، دەگەنمەن باستاپقىدا بيۋدجەتتە 1 ترلن. تەڭگە بەكىتىلگەن).
"سونىمەن قاتار، اعىمداعى جىلى ەسەپ كوميتەتىنىڭ تەكسەرۋلەرىنىڭ ناتيجەلەرى بويىنشا تريلليون تەڭگەگە بيۋدجەت قاراجاتىنىڭ ءتيىمسىز پايدالانىلعانى انىقتالدى. قۇرمەتتى اۋديتورلار مەن ءتارتىپ ساقشىلارى، ەندى جاي قول قۋسىرىپ وتىرماي، مۇنداي ىستەر ءۇشىن جاۋاپتىلاردىڭ، وبرازدى تۇردە ايتقاندا، قولدارىن شابۋ كەرەك شىعار. ال ۇلتتىق قوردىڭ شەكتى مولشەرى شەڭبەرىنەن شىعۋ بولجامىنا كەلەتىن بولساق: بۇل بولجام ۇكىمەتتىڭ جوسپارى نەمەسە "ماقساتى" رەتىندە ەمەس، الدىن الۋعا ءتيىستى اعىمداعى الاڭداتارلىق ۇردىستەردى باعالاۋ رەتىندە قابىلدانۋ كەرەك", - دەپ تۇيىندەدى دەپۋتات.
"ادىرنا" ۇلتتىق پورتالى.
