باتىس قازاقستان وبلىسىنداعى بايتەرەك اۋدانىنا قاراستى دوستىق اۋلىنىڭ تۇرعىندارى بالالارىن سىرتقا جىبەرۋگە قورقىپ وتىر، دەپ حابارلادى “استانا” ارناسى.
اتا-انالاردىڭ ايتۋىنشا، 6 جانە 9-سىنىپ وقۋشىلارىن ەرەسەكتەر سوققىعا جىعۋدى ادەتكە اينالدىرعان. بۇل قىلىعىن اۋىل تەنتەكتەرى "تاربيە جۇمىسى" دەپ ءتۇسىندىرىپتى.
ەرەسەك بالالار كىشىلەردەن ۇدايى امانداسىپ، سىپايى بولۋدى تالاپ ەتكەن. ال بۇعان كونبەگەندەردى سوققىعا جىعىپ، قالعاندارىن قورقىتىپ-ۇركىتۋگە كىرىسكەن. امالى تاۋسىلعان اتا-انالار پوليتسياعا دا شاعىمدانىپ، ارىز جازىپتى.
"بالالاردىڭ دەنەسىندە كوگەرگەن جەر پايدا بولماۋ ءۇشىن، بۇيرەگىنەن، جۇمساق جەرىنەن ۇرادى. ءتىپتى بەتىنەن ۇرعاندا وزىنە ىڭعايلى بولۋى ءۇشىن وقۋشىلاردى جۇرەلەپ وتىرعىزىپ قويعان. ۇلىما بەلگىسىز بىرەۋلەر تەلەفون شالىپ، ۇيدەن ءجيى كەتىپ قالادى. كىم شاقىرىپ جاتقانىن دا ايتپايدى. ۇرعانداردىڭ ىشىندە جوعارى سىنىپ وقۋشىلارى، مەكتەپ تۇلەكتەرى، ءتىپتى ستۋدەنتتەر دە بار", - دەيدى جابىرلەنگەن وقۋشىنىڭ اناسى ناتاليا كوركينا.
مەكتەپ ديرەكتورى مۇنداي جاعدايدىڭ بارىن جوققا شىعاردى. اتا-انالار اسىرەلەپ وتىر دەيدى. بۇل وقيعادان قۇقىق قورعاۋشىلار دا حاباردار. جاۋاپتىلار ءبىلىم ورداسىنداعى جاعداي باقىلاۋدا دەپ سەندىردى.
"بالالار سوزگە كەلىپ قالعان. ءبىر-ءبىرىن شاپالاقپەن ۇرعان. ءبىز بۇل ماسەلەنى كوتەرىپ، بالالارمەن دە، اتا-انالارمەن دە سويلەستىك. بالالار ءبىر-بىرىنەن كەشىرىم سۇراپ، وزدەرىنىڭ قاتەلىكتەرىن مويىندادى، - دەيدى "دوستىق" ورتا مەكتەبىنىڭ ديرەكتورى سۆەتلانا گولۋبەۆا.
